ललितपुर । ऊर्जा, जलस्रोत तथा सिँचाइमन्त्री पम्फा भुसालले पछिल्ला घटनाक्रमहरुले जलवायु परिवर्तनका जोखिमहरु बढाउँदै लगेको बताएकी छन्।

आज यहाँ आयोजित ‘जलविद्युत परियोजनामा बाढी पूर्वसूचनाप्रणालीको व्यवस्था तथा स्थानीय निकायहरुसँगको सहकार्य र समन्वय’सम्बन्धी कार्यक्रममा मन्त्री भुसालले जलवायु परिवर्तनका कारण उत्पन्न जोखिमको उचित व्यवस्थापन नेपालका लागि चुनौती बन्दै गएको बताइन्। ‘जलवायु परिवर्तनको प्रत्यक्ष असर हाम्रा नदीनाला तथा वरपरका वस्तीहरुमा उच्चतम देखिन्छ। बाढी, पहिरोजस्ता प्रकोपहरुका कारण ठूलो जनधनको क्षति हुन पुगेको छ। जलविद्युत आयोजनामा समेत निकै असर परेको छ’, उनले भनिन्। 

मन्त्री भुसालले जलवायु परिवर्तनको असर निरन्तर बढ्ने क्रममा रहेकाले त्यसका लागि जिम्मेवार मुलुकले प्रभावित राष्ट्रलाई क्षतिपूर्ति उपलब्ध गराउनुपर्ने बताइन्। उनले भने, ‘जलवायु परिवर्तनका असर बढाउने मुलुकहरुले प्रभावित राष्ट्रलाई उचित क्षतिपूर्ति दिनुपर्छ।’ 

जलविद्युत आयोजनाहरु गुणस्तरीय र भरपर्दो तवरले निर्माण गर्न तथा विभिन्न प्रकोपका कारण आइपर्ने जोखिमबाट सुरक्षित राख्न आवश्यक रहेको उल्लेख गर्दै मन्त्री भुसालले आयोजनाहरुको दीगो विकासका लागि सुरक्षित कदम चाल्नुपर्नेमा जोड दिइन्। जलविद्युत आयोजनाहरु सुरक्षित नभएमा देशकै अर्थतन्त्रमा असर पर्न सक्नेतर्फ सचेत गराउँदै उनले जोखिम न्यूनीकरण गरी आयोजना निर्माण गर्नका लागि आवश्यक नीति तथा निर्देशिका बनाउन तथा विभिन्न निकायसँग समन्वय गर्न उर्जा मन्त्रालयले आवश्यक पहल गर्ने विश्वास दिलाइन्। 

जलवायु परिवर्तनको प्रभावले यही वर्ष दुईपटक वर्षा र बाढीका कारण ठूलो जनधनको क्षति व्यहोर्नु परेको स्मरण गर्दै मन्त्री भुसालले इलाम नगरपालिका र माई जोगमाई गाऊँपालिकाले आपतकालीन कार्य सञ्चालन केन्द्र स्थापना गरी जोखिम न्यूनीकरणमा खेलेको भूमिकाको प्रशंसा गरिन्। ‘पूर्वसूचना प्रणालीले प्राकृतिक प्रकोपबाट हुने जनधनको क्षति न्यूनीकरण गर्न सहयोग गर्ने विश्वास लिएकी छु’, उनले भनिन्, ‘यसका साथै पूर्वसूचना प्रणाली स्थापना गर्ने कार्य अन्य जलविद्युत आयोजनाहरुले समेत अवलम्बन गरेको खण्डमा, सोबाट आयोजनाका साथै स्थानीय समूदायलगायत सबैलाई फाइदा पुग्नेछ।’

मन्त्री भुसालले उत्पादित विद्युतलाई देशभित्रै खपत बढाउन तथा छिमेकी राष्ट्रलाई निर्यात गर्न आवश्यक नीति नियम तथा वातावरण तयार गरी जलविद्युतको दीगो विकासका लागि निरन्तर प्रयास गरिरहेको जानकारी पनि दिइन्।