धितोपत्र बोर्डद्वारा ‘एसआईएफ’ स्थापना र सञ्चालन गर्न ५ संगठित संस्थालाई अनुमति प्रदान

बोर्डमा एसआईएफ स्थापना र सञ्चालनको अनुमति माग्दै ९ वटा संस्थाले आवेदन दिएका थिए। तीमध्ये विशिष्टिकृत लगानी कोष नियमावली, २०७५ बमोजिम आवश्यक कागजात तथा विवरण पेस गर्ने ग्लोबल इक्विटी फन्ड प्रालि, लक्ष्मी क्यापिटल मार्केट लिमिटेड, एनआईबिएल एस क्यापिटल लिमिटेड, एनआइसी एशिया क्यापिटल लिमिटेड र एनएमबी क्यापिटल लिमिटेडलाई अनुमति प्रदान गरी आवश्यक पूर्वाधार तयार गर्न सूचित गरिएको धितोपत्र बोर्डले जनाएको छ। 

धितोपत्र बजारको विकास र विस्तारका लागि विभिन्न वित्तीय उपकरणहरुको विकास गरी सञ्चालन गर्ने क्रममा नयाँ वित्तीय उपकरणको रुपमा अन्तर्राष्ट्रिय धितोपत्र बजारमा प्रचलनमा रहेको प्राइभेट इक्विटी, भेन्चर क्यापिटलजस्ता कोषको स्थापना र सञ्चालनका लागि बोर्डबाट विशिष्टिकृत लगानी कोष नियमावली, २०७५ लागू भएको छ । प्राइभेट इक्विटी तथा भेन्चर क्यापिटलजस्ता कोषहरुमार्फत पूँजी परिचालन भई नवीनतम ज्ञान, सीप क्षमता भएका वा नयाँ वस्तु, सेवा, प्रविधि वा वौद्धिक सम्पत्तिसँग सम्बन्धित व्यवसाय वा नवीनतम उद्यम व्यवसायलाई सञ्चालन गर्न र नयाँ व्यवसाय, उद्यमहरुलाई सुरुआत गर्न स्वदेशी तथा बैदेशिक लगानी आकर्षण गरी लगानीका नयाँ अवसरहरु प्रदान गर्न सकिने भएकोले यस किसिमको कोषको स्थापना र सञ्चालनले पुँजी बजारको दायरा फराकिलो हुने, पुँजी बजारमा नयाँ एंव आधुनिक वित्तीय उपकरणको प्रयोग हुने, नवीनतम उद्यम व्यवसाय सञ्चालनका लागि स्वदेशी तथा विदेशी पुँजी जुटाउन सहयोग पुग्ने र लगानीकर्तालाई नयाँ लगानीको अवसर प्राप्त भई देशको समग्र आर्थिक विकासमा समेत टेवा पुग्ने धितोपत्र बोर्डको विश्वास छ। 

नेपालमा पहिलोपटक एसआईएफ स्थापना तथा सञ्चालन गर्नका लागि यस्ता कोष व्यवस्थापकलाई अनुमति प्रदान गर्न लागिएको हो । नेपालको पुँजी बजारमा हाल सेयर, डिबेन्चर, सामूहिक लगानी कोषजस्ता परम्परागत लगानीका उपकरणमात्र उपलब्ध भइरहेकोमा प्राइभेट इक्विटी तथा भेन्चर क्यापिटल कोषको नियमन व्यवस्था तथा प्रवेशसँगै पुँजी परिचालनको नयाँ वैकल्पिक उपकरणको विकास भई स्टार्ट अप व्यवसाय (क्तबचत गउ दगकष्लभकक) मा पूँजी परिचालन हुने, निजी क्षेत्रको श्रोत परिचलान हुने, उद्योग तथा परियोजनाको विकास विस्तार भई रोजगारीको थप अवसर सिर्जना हुने, व्यक्तिगत आय तथा राजस्वमा बृद्धि भई धितोपत्र बजारमार्फत् अर्थतन्त्रमा थप टेवा पुग्ने बोर्डले विश्वास लिएको छ ।