काठमाण्डौ । नेपाल उद्योग परिसंघले अर्थतन्त्रमा एकपछि अर्को समस्या देखिइरहेको समयमा बैंक तथा वित्तीय संस्थाबाट निक्षेपको ब्याजदर वृद्धिको निर्णय आउनु अनपेक्षित भएको जनाएको छ।

परिसंघले आज एक विज्ञप्ति जारी गर्दै यस्तो धारणा सार्वजनिक गरेको हो। अर्थतन्त्रका विद्यमान समस्या समाधानका उपाय अवलम्बनका लागि नेपाल सरकार, नेपाल राष्ट्र बैंक, निजी क्षेत्र र सम्पूर्ण सरोकारवालाहरुले सक्दो प्रयास गरिहेको समयमा बैंक तथा वित्तीय संस्थाबाट ब्याजदर वृद्धिको निर्णय आउनुले अर्थतन्त्र थप जोखिममा पर्ने संकेत गरेको पनि परिसंघले जनाएको छ। 

‘ब्याजदर वृद्धिबाट बजारमा तरलता थप भई हालको समस्या समाधान हुने अवस्था देखिँदैन’, परिसंघले भनेको छ, ‘यसले निक्षेपको स्थानान्तरण मात्र हुने र वित्तीय स्थायीत्वमा जोखिम बढ्ने हाम्रो बुझाइ छ।’

ब्याजदर वृद्धिको प्रत्यक्ष प्रतिकूल असर कोभिडलगायत विविध कारणले समस्यामा परेका उद्योग, कृषि, पर्यटन व्यवसायमा पर्ने निश्चित रहेको परिसंघको ठहर छ। ‘ब्याजदर बढ्दा लगानी महँगो भई बजार मूल्य बढ्दा उपभोक्तालाई समेत नकारात्मक असर पर्ने देखिएको छ’, विज्ञप्तिमा भनिएको छ, ‘वर्तमान अवस्थामा शिथिल प्रायः भएका उद्योगव्यवसाय थप कमजोर बन्ने देखिन्छ। यसर्थ मुलुकको अर्थ व्यवस्था जोगाउन सचेत हुनुपर्नेतर्फ परिसंघ सम्बन्धित सबैमा हार्दिक आग्रह गर्दछ।’

सरकारी स्वामित्वका ठूला बचतकर्ताको संस्थागत निक्षेपलाई पुरानै ब्याजमा कायम राख्दा बजारमा देखा परेको ब्याज बढाउने प्रतिस्पर्धामा केही कमी आउने परिसंघको भनाइ छ। ‘विद्यमान संकटको समयमा केन्द्रीय बैंकले वाणिज्य बैंकहरुश्रले पूरा गर्नुपर्ने नियमनकारी अनुपातहरुलाई केही समयका लागि खुकुलो बनाउन आवश्यक देखिन्छ’, परिसंघले सुझाव दिएको छ, ‘यसले तरलता व्यवस्थापनमा सहजता भई लघु, घरेलु, साना, मझौला तथा ठूला उद्योगलाई राहत पुर्याई रोजगारी सिर्जनामा समेत सहयोग गर्ने हाम्रो विश्वास छ। यसले वर्तमान आर्थिक संकटको अवस्थामा समेत अर्थतन्त्रलाई चलायमान बनाउन सहयोग पुर्याउने छ।’  

ब्याजदरलाई स्थिर गर्ने तथा त्यसलाई पारदर्शी बनाउने उद्देश्यले नेपाल राष्ट्र बैंकले मासिक रुपमा आगामी महिनाको ब्याजदर प्रकाशन गर्ने नियम लागू गरेको छ। यसलाई प्रत्येक तीन महिनामा मात्र ब्याजदर परिवर्तन गर्न पाउने गरी व्यवस्था गर्न परिसंघ राष्ट्र बैंकसमक्ष अनुरोध गरेको छ। 

त्यस्तै राष्ट्र बैंकले हालै विभिन्न उपभोग्य वस्तु आयातमा सतप्रतिशतसम्म मार्जिन राखी प्रतीतपत्र खोल्नु पर्ने प्रावधान गरेको छ। ‘मुलुकमा खस्कँदो विदेशी मुद्राको सञ्चितिका कारण यस्तो गरिएको भए पनि यसले आयात संकुचित भई मागअनुसार वस्तुको उपलब्धता नहुने र मुद्रास्फीतिलाई समेत बल पुग्ने हाम्रो बुझाइ छ’, विज्ञप्तिमा भनिएको छ, ‘जुन हालको अवस्थामा अर्थ व्यवस्थाका लागि अर्को खतरा हुन सक्छ, यसतर्फ समेत ध्यान दिन परिसंघ सबैमा आग्रह गर्दछ।’