काठमाण्डौ । ठूला भौतिक पूर्वाधार निर्माणका लागि आन्तरिक तथा बाह्य लगानी भित्र्याउने लक्ष्यका साथ स्थापना भएको नेपाल इन्फ्रास्ट्रक्चर बैंकले रु. ८ अर्बबराबरको साधारण शेयर बिक्री गर्ने भएको छ ।

आईपीओ बिक्री गर्नेसम्बन्धी द्विपक्षीय सम्झौतामा बिहीबार एनआइबिएलएस क्यापिटल र बैंकबीच सम्झौतामा हस्ताक्षर भएको छ ।

बैंकले दिएको जानकारी अनुसार प्रति कित्ता रु. १०० का दरले कूल ८  करोड कित्ता साधारण शेयर बिक्री गर्न लागिएको हो । सर्वसाधारणलाई बिक्री गर्न लागिएको यो आईपीओ पछिल्ला दिनमा बिक्री गर्न लागिएको सबैभन्दा ठूलो हो ।

सेयर निष्काशनसम्बन्धी सम्झौतापत्रमा बैंकको तर्फबाट नायव महाप्रबन्धक विनयनाथ न्यौपाने र एनआईबिएल एस क्यापिटलको तर्फबाट नायव प्रमुख कार्यकारी अधिकृत मेखबहादुर थापाले हस्ताक्षर गर्नुभएको बैंकले जनाएको छ ।

बैंकको कूल अधिकृत पूँजी रु ४० अर्ब, जारी पूँजी रु २० अर्ब र चुक्ता पूँजी रु १२ अर्ब रहेको छ ।

सर्वसाधारणलाई साधारण शेयर बिक्री गरेपछि बैंकको चुक्ता पूँजी रु २० अर्ब हुनेछ । बैंकले जलविद्युत्, सौर्य ऊर्जा, होटल, रिसोर्ट, फनपार्क, केवलकार, शिक्षा, स्वास्थ्यलगायतका पूर्वाधार क्षेत्रका लगानी गर्ने लक्ष्य राखेको छ ।