पुटिनको चेतावनी-‘विश्वका लागि यो दोस्रो विश्वयुद्धपछिकै सबैभन्दा खतरनाक दशक’

काठमाण्डौ । रुसी राष्ट्रपति भ्लादिमिर पुटिनले बिहीबार विश्व दोस्रो विश्वयुद्धपछिको सबैभन्दा खतरनाक दशकबाट गुज्रिरहेको चेतावनी दिएका छन्।

यस सम्बोधनमा पुटिनले युक्रेनमा रुसको आक्रमणको निर्णयलाई एकपटक फेरि जायज ठहराउने प्रयास गरेका छन्। जसका कारण रुस विश्वमा एक्लिँदै गएको छ।

पुटिनले पश्चिमी देशहरुले रुसलाई एक्लो पार्न आणविक हतियारका साथ ब्ल्याकमेल गरेको आरोप पनि लगाए। पश्चिमी देशहरुले भने आणविक हतियार प्रयोग गर्ने रुसी धम्कीको निन्दा गरेका छन्।

युरोपेली देशहरुको सैन्य गठबन्धन नाटोले यसै साताको सुरुमा रुसी दाबीहरुको निन्दा गरेको थियो। जसमा रुसले युक्रेनले डर्टी बमहरु प्रयोग गर्न सक्छ भनी भनेको थियो।

डर्टी बमले रेडियोधर्मी पदार्थले सुसज्जित पारम्परिक विस्फोटक पदार्थलाई जनाउँछ।

नाटोका महासचिव जेन्स स्टोल्टनबर्गले नाटो सदस्यहरुले ‘अभियोग अस्वीकार’ गरेको बताएका छन्। यससँगै उनले रुसले द्वन्द्वलाई आधार बनाएर बढाउन नहुने पनि उल्लेख गरे। 

युक्रेनसँगै सात महिना लामो युद्धमा भएको नोक्सानी र ३० लाख मानिसलाई युद्धमा पठाउने भर्खरै गरेको घोषणाका कारण जनतामा आक्रोश बढ्दै गएको बेला ‘भाल्डाई फोरम’ नामको वार्षिक कार्यक्रममा पुटिनले आफ्नो भाषणमा यस्तो उल्लेख गरेका हुन्। यो कार्यक्रमको ठीक एक दिनअघि उनले एक नियमित आणविक अभ्यासको निरीक्षण गरेका थिए। जसमा शत्रुबाट भारी परमाणु आक्रमणपछि परमाणु आक्रमणको प्रतिकार गर्ने अभ्यास समावेश थियो।

आफूमाथि आणविक हमलाको धम्की दिएको आरोपमा पुटिनले भने, ‘रुसले आणविक हतियारको सम्भावित प्रयोगमा हामीले कहिल्यै अगाडि बढेका छैनौँ र केही भनेका छैनौँ। हामीले पश्चिमी देशका नेताहरुको भनाइको संकेतमा मात्रै प्रतिक्रिया दिएका छौँ।’ –एजेन्सी