काठमाण्डौ । साताको सुरुवातमै नेप्से परिसूचक दोहोरो अंकले घटेर लगानीकर्तामा संशय पैदा गरिदिएको छ । १६.६३ अंकले घटी नेप्से परिसूचक १६२७.२४ अंकमा झरेको हो । बजारमा दोहोरो अंकको पहिरो गए पनि ५ कम्पनी भने मालामाल भएका छन् ।  

परिसूचक(इण्डेक्स) दोहोरो अंकले घटे पनि अघिल्लो कारोबार दिनको तुलनामा कारोबार(टर्नओभर)मा भने केही सुधार देखिएको छ । परिसूचकमा दोहोरो अंकको गिरावट आए पनि कारोबार रकम चाहि मेन्टेन हुनुुले भविष्यमा बजार धेरै घट्दैन भन्ने संकेत गर्ने विश्लेषक बताउँछन् । 

यो दिन नेप्सेका २ समूहमा सामान्य बढोत्तरी भएको छ भने बाँकी सबै समूहको सूचकमा रातो पोतिएको छ । 

वाणिज्य बैंक, बिमा र विकास बैंकमा क्रमशः १८.६९, १०४.८७  र १५.२३ अंकको गिरावट आएको छ । यस्तै, होटल समूह ४९.६९, जलविद्युत समूह २२.२३ र बित्त समूह ६.५१ अंकले घटेको छ । 

उत्पादनमूलक ५४.४६ अंकले बढेको छ भने अन्य समूहमा ०.८७ अंकको झिनो बढोत्तरी देखिएको छ । 

'क' वर्गका कम्पनीहरुप्रति आकर्षण घटेका कारण सेन्सेटिभ इण्डेक्स ४.०८ अंकले घटेको छ भने समग्र कारोबार मापक फ्लोट इण्डेक्समा पनि १.३४ अंकको गिरावट देखिएको छ । 

धेरै कारोबार गर्ने कम्पनी
साताको पहिलो कारोबार दिन बजारमा १ सय ४६ कम्पनीका कुल ११ लाख ९७ हजार १ सय ११ कित्ता सेयर ६८ करोड १८ लाख ९० हजार १ सय ९३ रुपैयाँमा किनबेच भएको छ । 

यो दिन सबैभन्दा बढी नेपाल इन्स्योरेन्स कम्पनीले लिमीटेडले ४ करोड १५ बढीको कारोबार गरेको छ । जनता बैंक लिमीटेडले २ करोड ९५ लाख, स्वरोजगार लघुवित्त विकास बैंकले २ करोड ८७ लाख, एनबी इन्स्योरेन्सले २ करोड ८३ लाख, एभरेष्ट इन्स्योरेन्स कम्पनीले २ करोड ७४ लाख, हिमालय जनरल इन्स्योरेन्सले २ करोड ५६ लाख बढीको कारोबार गरेका छन् । यो दिन धेरै कारोबार गर्ने १० कम्पनीको सूचिमा ६ स्थान बिमा कम्पनीले ओगटे भने २ स्थान वाणिज्य बैंक र बाँकी २ स्थान विकास बैंकले कब्जा गरे । 

धेरै कमाउने र गुमाउने कम्पनी
बजार दोहोरो अंकले घटे पनि ५ कम्पनीले चाहि पैसा छापेका छन् । एनबी इन्स्योरेन्स र बोटलर्स नेपाल(तराई) लिमीटेडको सेयर मूल्य १० प्रतिशतले बढेको छ । यस्तै, सिनर्जी पावर डेभलपमेन्ट लिमीटेड, हिमालयन डिस्टीलरी लिमीटेड र मेरो माइक्रो फाइनान्स बित्तीय संस्थाको मूल्य पनि १० प्रतिशतको हाराहारीमा वृद्धि भएको छ । 

धेरै कारोबार गरे पनि जनता बैंक नेपालको सेयर मूल्य भने घटेको छ । यो बैंकको मूल्य ६.२६ प्रतिशतको गिरावट आएको हो । भार्गव विकास बैंकको सेयर मूल्य पनि ५ प्रतिशतको हाराहारीमा घट्यो ।