बजारमा अशुभ संकेत, निराश पारे सबै क्षेत्रले

काठमाण्डौ । राजनीतिदेखि बित्तीय क्षेत्रले समेत लगानीकर्तालाई उत्साहित बनाउन नसक्दा सेयर बजारमा मन्दी छाउने क्रम जारी छ । साताको पहिलो कारोबार दिनको अवस्था हेर्दा आउँदा दिनमा बजार अझ केही तल जानसक्ने देखिएको छ । कारण, दोहोरो अंकले घटेको बजारमा कारोबार रकम पनि घट्दो छ । यसरी बजार परिसूचक र कारोबार रकम एकसाथ समानान्तर ढंगले घट्नुु बजारका लागि 'अशुुभ संकेत' मानिन्छ । 

पहिलो चरणको निर्वाचनपछि पनि बजारमा तरलताको समस्यामा सुधार नहुुनुु, बजेटले सेयर बजारलाई निराश पार्नु र राजनीतिक अवस्था अन्यौलमा फस्दै जाँदा बजारले अपेक्षित सुधार हासिल गर्न नसकेको हो । 

आइतबार नेप्से परिसूचक १०.५ अंकले घटी १५९३.८१ अंकमा झरेको छ । २ महिनाको अवधिमा अघिल्लो साता एकदिन बजार १६ सय तल झरेकोमा यो साताको पहिलो दिन नै बजार १६ सय मुनि दोश्रोपटक झरेको छ । यो हिसाबले २ महिनाको न्यून विन्दूमा बजार झरेको देखिएको हो । 

आइतबार बजारमा एक समूह बाहेक अन्य सबै समूहमा रातो पोतिएको छ । बजारमा ठूलो हिस्सा ओगट्ने र बजारको उतारचढावमा पार्नसकने क्षमता रहेको वाणिज्य बैंक समूहमा ९.१९ अंकको गिरावट आएको छ । यस्तै बिमा समूह ९५.०६ अंकले घटेको छ । विकास बैंक, बित्त, होटल, जलविद्युुत समूहमा क्रमशः ७.६९, १.०९, १५.५५ र ३०.६९ अंकले घटेका छन् । उत्पादनमूलक १३.०१ अंकले घटेको छ भने अन्य समूह चाहि ०.८६ अंकको झिनो बढोत्तरीमा सीमित भएको छ ।

‘क’ वर्गको कारोबारमा मन्दी आएका कारण सेन्सेटिभ इण्डेक्स २.२७ अंकले घटेको छ भने समग्र कारोबार समेत घट्दा फ्लोट इण्डेक्समा ०.७८ अंकको गिरावट देखिएको छ । 

धेरै कारोबार गर्ने कम्पनी
आइतबार बजारमा १ सय ४१ कम्पनीका ९ लाख ५० हजार ४ सय ७३ कित्ता सेयर ५५ करोड ६७ लाख ३६ हजार १ सय ६५ रुपैयाँमा किनबेच भयो । सबैभन्दा बढी कारोबार स्ट्याण्डर्ड चार्टर्ड बैंकले गर्यो । यो बैंकले ४ करोड १५ लाख बढीको कारोबार गर्यो । यस्तै, कुमारी बैंक लिमीटेडले २ करोड १३ लाख, गुराँस लाइफ इन्स्योरेन्सले २ करोड ९ लाख, हिमालयन जनरल इन्स्योरेन्सले २ करोड ७ लाख, नेपाल इन्भेष्टमेन्ट बैंकले २ करोड ४ लाख, यूनाइटेड मोदी हाइड्रोपावरले १ करोड ९६ लाख बढीको कारोबार गरे । धेरै कारोबार गर्ने १० कम्पनीको सूचिमा ६ स्थान वाणिज्य बैंक, ३ स्थान बिमा कम्पनी र बाँकी एक स्थान जलविद्युत कम्पनीको कब्जामा रह्यो । 

धेरै कमाउने र गुमाउने कम्पनी
घट्दो बजारमा आरएसडिसी लघुवित्त बित्तीय संस्थाका लगानीकर्ता मालामाल भए । यो कम्पनीको सेयर मूल्य १० प्रतिशतको हाराहारीमा वृद्धि भयो । यूनाइटेड मोदी हाइड्रोपावरको सेयर मूल्य ७ प्रतिशतको हाराहारीमा बढ्यो । 

यस्तै, यो दिन कर्णाली डेभलमेन्ट बैंकको सेयर मूल्य सबैभन्दा धेरै घट्यो । यो बैंकको मूल्य ५ प्रतिशत भन्दा बढीले घट्यो ।