बजार अनुगमनमा सक्रिय हुँदै उपभोक्ता संरक्षण विभाग, एकैदिन करिब ५ लाख जरिवाना

काठमाण्डौ । वाणिज्य, आपूर्ति तथा उपभोक्ता संरक्षण विभाग दसैँ नजिकिएसँगै बजार अनुगमनमा सक्रिय भएको छ ।

विभागले बुधबार बजार अनुगमनका क्रममा  विभिन्न स्थानका व्यापारिक फर्म तथा पसलमा छड्के चेक जाँच गर्दा ४ लाख ८७ हजार ५०० रुपैयाँ  जरिवाना गरेको हो ।

विभागले बजार अनुगमनका क्रममा उपत्यका र आसपासका जिल्लाका व्यापारिक फर्मलाई कारबाही गरेको हो । विभागका प्रवक्ता आनन्द पोखरेलका अनुसार ५ वटा कम्पनीलाई ५० हजार रुपैयाँ जरिवाना गरिएको भने अर्को एउटा कम्पनीलाई १ लाख रुपैयाँ जरिवाना गरिएको छ ।

यसैगरी, विभागले चितवनस्थित रामनगरको एउटा होटेललाई १० हजार जरिवाना गरेको छ । होटेलले रिलेवलिङ गरिएको गुणस्तरहीन वस्तुको बिक्री गरेको पाइएको छ। यस्तै, चितवनको अर्को होटेललाई २ हजार ५०० रुपैयाँ, सलाङघाटको होटेललाई १० हजार रुपैयाँ जरिवाना गरिएको छ ।

चितवनकै रामनगरको किराना पसललाई १० हजार, चितवनको अर्को किराना पसललाई १० हजार रुपैयाँ, मुग्लिङको होटेललाई २४ हजार ५०० रुपैयाँ, काठमाण्डौको खिचापोखरीस्थित रेडिमेड तथा थान कपडा पसललाई १५ हजार, धार्केको खाद्य वस्तु पसललाई २० हजार, धादिङको होटेललाई २० हजार रुपैयाँ जरिवाना गरिएको छ । 

यसैगरी, विभागले नवलपरासीको होटेललाई ५० हजार, मुग्लिङको पसललाई १ लाख रुपैयाँ जरिवाना गरेको छ ।