काठमाण्डौ । स्थानीय निकायको निर्वाचनतर्फ मानिसको ध्यान केन्द्रीत भएको बेला बजार समेत सुस्ताएको छ । अधिकांश लगानीकर्तालाई समेत राजनीतिले छोएपछि मंगलबार बजार परिसूचक ९.९९ अंकले घटेको छ भने कारोबार रकम पनि निकै धेरै घटेको छ । 

चुनावमा अधिकांश लगानीकर्ता व्यस्त हुँदा र अधिकांशको ध्यान चुनावी मतपरिणाम तथा मतगणनामै केन्द्रीत भएका कारण सेयर बजार सुस्ताएको विश्लेषकहरुले बताएका छन् । मत परिणामको प्रतिक्षामा धेरै लगानीकर्ता पर्ख र हेरको रणनीतिमा बस्दा समेत बजार प्रभावित भएको छ । 

मंगलबार उत्पादमूलक बाहेक सबै समूहको सूचकमा रातो पोतिएको छ । उत्पादनमूलक समूह ३०.८९ अंकले बढेको छ । वाणिज्य बैंक, बिमा, विकास बैंक र बित्त समूह क्रमशः १०.४१, ४६.०७, १४.५१ र ५.७ अंकले घटेको छ । यस्तै, जलविद्युत समूह १९.९, होटल समूह १७.५३ र अन्य समूहमा ०.५८ अंकको गिरावट देखिएको छ । 

'क' वर्गका कम्पनीहरुको कारोबारमा मन्दी आएका कारण सेन्सेटिभ इण्डेक्स २.४२ अंकले घटेको छ भने समग्र कारोबार मापक फ्लोट इण्डेक्स समेत ०.८५ प्रतिशत घटेको छ ।

धेरै कारोबार गर्ने कम्पनी
१ सय ४० कम्पनीका कुल २८ लाख २१ हजार ७ सय १५ कित्ता सेयर ५० करोड ४९ लाख ८५ हजार ६ सय ५८ रुपैयाँमा कारोबार भयो । सबैभन्दा बढी स्ट्याण्डर्ड चार्टर्ड बैंकको १ करोड ९१ लाख बढीको सेयर किनबेच भएको छ । 

यस्तै, लाइफ इन्स्योरेन्स कर्पोरेसन नेपालले १ करोड ८९ लाखको कारोबार गरेको छ । यस्तै, सिद्धार्थ बैंकको १ करोड ७५ लाख बराबरको संस्थापक सेयर समेत किनबेच भएको छ । नेपाल लाइफ इन्स्योरेन्सले १ करोड ६६ लाख, प्रभूू बैंकले १ करोड ४७ लाख बढीको कारोबार गरेको छ । मंगलबार धेरै कारोबार गर्ने १० कम्पनीको सूचिमा ६ स्थान वाणिज्य बैंकले कब्जा गरे भने ३ स्थान बिमा कम्पनी र एक स्थान जलविद्युत कम्पनीले कब्जा गरे । 

धेरै कमाउने र गुमाउने कम्पनी
मंगलबार पनि सोमबारकै कम्पनीका लगानीकर्ता मालामाल भए । बोटलर्स नेपाल तराई लिमीटेड र प्रोग्रेसिभ फाइनान्सको सेयर मूल्य १० प्रतिशतको हाराहारीमा बढ्यो । मंगलबार पनि यिनै २ कम्पनीको सेयर मूल्य सबैभन्दा धेरै बढेको थियो । जेबिल्स फाइनान्सको सेयर मूल्य ७ प्रतिशत भन्दा बढीले वृद्धि भयो । 

मंगलबार दिव्यश्वरी हाइड्रोपावरको सेयर मूल्य सबैभन्दा धेरै ७ प्रतिशतको हाराहारीमा घट्यो ।