काठमाण्डौ । बुधबार दोहोरो अंकले बढेको बजार बिहीबार स्थिर बनेको छ । बजारमा ३.८ अंकको झिनो गिरावट मात्र देखियो ।

तरलताको समस्या बढ्दै जाँदा लगानी गर्ने पैसाको अभावमा बजार सुस्ताएको हो । यस्तै, केही पैसा हुने लगानीकर्ता समेत दोश्रो बजारलाई छाडेर सार्वजनिक निश्कासन र बैंकहरुले उच्च ब्याज दिने भएपछि फिक्स्ड डिपोजिटतर्फ केन्द्रीत भएका छन् । वाणिज्य बैंकहरुले फिक्स्ड डिपोजिटमा साढे १३ प्रतिशतसम्म ब्याजको अफर निकालेपछि जोखिमरहित रिटर्नका लागि धेरैले पैसा बैंकमा हाल्न थालेका छन् । 

नेप्से परिसूचक ३.८ अंकले घटेर १६०४.३१ अंकमा झरेको हो । जलविद्युत र उत्पादनमूलक बाहेक बाँकी सबै समूहको सूचकमा रातो पोतिएको छ । 

दुुई बाहेकका सबै समूह घटे पनि तिनीहरुको गिरावट झिनो मात्र छ । वाणिज्य बैंक समूह १.७५ अंक, होटल समूह २५.३२, विकास बैंक ९.९५, बित्त समूह ३.८, बिमा समूह १०.४९ र अन्य समूह ८.९६ अंकले घटेका छन् । 

जलविद्युत समूहमा ७.०४ र उत्पादनमूलकमा १९.१६ अंकको वृद्धि देखिएको छ । 

‘क’ वर्गका कम्पनीको कारोबार मापक सेन्सेटिभ इण्डेक्स ०.९३ अंकले घटेको छ भने समग्र कारोबार समेत खुम्चिएपछि फ्लोट इण्डेक्समा ०.२४ अंकको गिरावट देखिएको छ । 

धेरै कारोबार गर्ने कम्पनी 
बिहीबार बजारमा १ सय ४७ कम्पनीका ११ लाख ९२ हजार ९ सय ५८ कित्ता सेयर ६४ करोड ९१ लाख ७ हजार ४ सय ४७ रुपैयाँमा किनबेच भयो । 

यो दिन सबैभन्दा बढी एशियन लाइफ इन्स्योरेन्सको संस्थापक सेयरको कारोबार भयो । यो कम्पनीको ६ करोड २३ लाख बढीको संस्थापक सेयर किनबेच भयो । 

यस्तै, स्ट्याण्डर्ड चार्टर्ड बैंकले ३ करोड ४८ लाख, गुरासँ लाइफ इन्स्योरेन्सको २ करोड ८४ लाख, हिमालयन जनरल इन्स्योरेन्सको २ करोड ४७ लाख, बैंक अफ काठमाण्डू लिमीटेडको २ करोड ४३ लाख, ग्लोबल आइएमई बैंकको २ करोड ४१ लाख बढीको सेयर कारोबार भयो । बिहीबार धेरै कारोबार गर्ने १० कम्पनीको सूचिमा ६ स्थान वाणिज्य बैंक र ४ स्थान बिमा कम्पनीले कब्जा गरे । 

धेरै कमाउने र गुमाउने कम्पनी
यो दिन सबैभन्दा बढी यूनाइटेड मोदी हाइड्रो लिमीटेडले कमायो । यो कम्पनीको सेयर मूल्य १० प्रतिशतको हाराहारीमा वृद्धि भयो । यस्तै, कर्णाली डेभलपमेन्ट बैंक लिमीटेडको सेयरधनीले समेत ९ प्रतिशतको हाराहारीमा सम्पत्ति बढाए । रिलायन्स फाइनान्सको सेयर मूल्यमा ८ प्रतिशतको हाराहारीमा वृद्धि देखियो । 

यस्तै, श्री इन्भेष्टमेन्ट फाइनान्स कम्पनी र पूर्णिमा विकास बैंकका लगानीकर्ताले सबैभन्दा धेरै गुमाए । यी दुवै कम्पनीको सेयर मूल्य ५ प्रतिशतले घट्न पुुग्यो ।