काठमाण्डौ । नेपाल स्टक एक्सचेन्ज (नेप्से)ले राष्ट्र उत्थान लघुवित्त वित्तीय संस्थाको सेयर कारोबार फुकुवा गरेको छ। 

नेप्सेको आजको निर्णयबाट राष्ट्र उत्थान लघुवित्तको सेयर कारोबार फुकुवा भएको हो। अब आइतबारबाट यो लघुवित्तको सेयर कारोबार गर्न सकिनेछ।

नेप्सेले ढिला गरी कारोबार समयमा लाभांश प्रस्तावसम्बन्धी निर्णयबारेको सूचना नेप्सेमा पठाएको भन्दै गत मंगलबार (वैशाख १९ गते)बाट राष्ट्र उत्थान लघुवित्तको सेयर कारोबार रोक्का गरेको थियो। सेयर कारोबार रोक्का गर्दै नेप्सेले ३ कार्यदिनभित्र यस विषयमा स्पष्टीकरण पेस गर्न पनि राष्ट्र उत्थान लघुवित्तलाई निर्देशन दिएको थियो।

राष्ट्र उत्थान लघुवित्तले सूचना प्रवाहसम्बन्धी गलत बुझाइका कारण समयमै लाभांश प्रस्तावसम्बन्धी सूचना जानकारी गराउन नसकेको भन्दै क्षमयाचना गरेपछि सचेत गराउँदै सेयर कारोबार फुकुवा गरिएको नेप्सेले जनाएको छ।  

संस्थाले आर्थिक वर्ष २०७८–७९का लागि लाभांश प्रस्ताव गरेको छ। 

संस्थाको वैशाख १३ गते बसेको सञ्चालक समितिको बैठकले उक्त आर्थिक वर्षको मुनाफाबाट सेयरधनीहरुलाई हाल कायम चुक्तापुँजी २६ करोड रुपैयाँको कुल १५ प्रतिशतले हुन आउने ३ करोड ९० लाख रुपैयाँबराबरको लाभांश वितरण गर्ने प्रस्ताव गरेको हो। 

प्रस्तावित लाभांशमा १४.२५ प्रतिशतले हुन आउने ३ करोड ७० लाख ५० हजार रुपैयाँबराबरको बोनस सेयर र कर प्रयोजनार्थ ०.७५ प्रतिशतले हुन आउने १९ लाख ५० हजार रुपैयाँबराबरको नगद लाभांश छन्। 

प्रस्तावित लाभांश नेपाल राष्ट्र बैंकको स्वीकृतिपछि आगामी वार्षिक साधारणसभाबाट अनुमोदन गरी कार्यान्वयन गरिने संस्थाले जनाएको छ।