रिलायबल नेपाल लाइफको आईपीओ बाँडफाँड, झन्डै ४ लाख आवेदकको हात खाली

काठमाण्डौ । रिलायबल नेपाल लाइफ इन्स्योरेन्स कम्पनीको आईपीओ आज बुधबार बाँडफाँड गरिएको छ। 

धितोपत्र बिक्री प्रबन्धक सिभिल क्यापिटल मार्केटको कार्यालयमा रिलायबल नेपाल लाइफको आईपीओ बाँडफाँड गरिएको हो। आईपीओ बाँडफाँड कार्यक्रम साँझ साढे ५ बजे राखिएको छ। 

कम्पनीले गते साउन २३ गतेदेखि साउन २६ गतेसम्म सर्वसाधारणका लागि आईपीओ बिक्री खुला गरेको थियो। कम्पनीले अंकित मूल्य १०० रुपैयाँमा १५७ रुपैयाँ प्रिमियम थप गरी प्रतिसेयर २५७ रुपैयाँमा सर्वसाधारणलाई बिक्री गरेको छ। कम्पनीले कर्मचारी र सामूहिक लगानी कोषलाई छुट्याएर सर्वसाधारणका लागि कुल ९६ लाख कित्ता आईपीओ निष्कासन गरेको थियो। 

सिभिल क्यापिटलका अनुसार यो आईपीओमा कुल १३ लाख ६४ हजार ३५३ आवेदन परेको थियो। तीमध्ये १३ लाख ५६ हजार ८३५ आवेदनमात्रै सदर भएका छन् भने ७ हजार ५१८ आवेदन बदर भएका छन्। 

मागभन्दा बढी आवेदन परेका कारण यो आईपीओ पनि गोलाप्रथाबाट बाँडफाँड गरिएको छ। जसमा भाग्यमानी ९ लाख ६० हजार आवेदकले १० कित्ताका दरले सेयर पाएका छन्। यो हिसाबले सदर आवेदकमध्ये ३ लाख ९६ हजार ८३५ आवेदकको हात खाली भएको छ। 

यो आईपीओको अन्तिम नतिजा केहीबेरमा सार्वजनिक हुनेछ। अन्तिम नतिजा धितोपत्र बिक्री प्रबन्धक र धितोपत्र निष्कासनकर्ता कम्पनीको वेबसाइटका साथै सीडीएससीको iporesult.cdsc.com.np  मा हेर्न सकिनेछ।