काठमाण्डौ । नेपाल उद्योग परिसंघ र संयुक्त टे«ड युनियन समन्वय केन्द्र (जेटीयूसीसी)बीच श्रम र रोजगारलगायतका विषयमा छलफल भएको छ। 

परिसंघको रोजगारदाता परिषद्ले जेटीयूसीसीको पाँचौँ श्रम संसदबाट चयन भएका पदाधिकारीलाई स्वागत तथा बधाइ दिन आयोजना गरेको कार्यक्रममा नेपालको आर्थिक अवस्था, श्रम, रोजगार, श्रमिक र रोजगारदाताबीचको सम्बन्ध लगायतका विषयमा छलफल भएको हो।

परिसंघका अध्यक्ष विष्णुकुमार अग्रवालले जेटीयूसीसीको पाँचौँ श्रम संसदबाट चयन भएका अध्यक्ष एवं पदाधिकारीहरुलाई बधाइ एवं सफल कार्यकालको शुभकामना दिँदै कोडिभ १९ को विशेष परिस्थितिमा कर्मचारीहरुले समझदारीपूर्ण सहयोग गरेको बताए। जेटीयूसीसीको स्थापना भएदेखि राम्रो श्रम सम्बन्ध स्थापित हुँदै आएको भन्दै उनले ट्रेड युनियन र कर्मचारीहरुबाट राम्रो सहयोग पाइरहेको बताए। 

मुलुकको अर्थतन्त्रको अहिलेको मुख्य चुनौती तरलता, शोधनान्तर घाटा, विदेशी मुद्रा सञ्चितीमा परेको चाप रहेको अध्यक्ष अग्रवालले बताए। ‘तरलताको समस्या हुँदा उद्योगीहरुले बैंकबाट ऋण पाइरहेका छैनन्। नयाँ उद्योगहरु स्थापना हुन सकेका छैनन्। भएका उद्योगहरुले पनि लगानी विस्तार गर्न पाइरहेको अवस्था छैन’, उनले भने। 

आन्तरिक उत्पादनको प्रवर्द्धन गरिनुपर्ने आवश्यकता औल्याउँदै अग्रवालले परिसंघले औद्योगिकीकरणलाई बढावा दिन जोड दिँदै आएको बताए। औद्योगिकरणले रोजगारी सिर्जना हुने, आन्तरिक उत्पादन बढ्ने र आयात प्रतिस्थापन हुँदै जाने उनले बताए। 

कार्यक्रममा जेटीयूसीसीका अध्यक्ष प्रेमलकुमार खनालले श्रमिकको समस्या समाधान गर्न केन्द्र साझा थलो बनेको बताए। उनले न्यूनतम पारिश्रमिक लागू गर्ने विषय चुनौतीपूर्ण रहेको भन्दै योगदानमा आधारित सामाजिक सुरक्षा कोषमा पनि थोरैमात्र कर्मचारी र श्रमिक आबद्ध भएको बताए। उनले श्रमिकहरुको सीप विकासमा रोजगारदातासहित राज्यले पनि दायित्व निर्वाह गर्नुपर्नेमा जोड दिए। 

कार्यक्रममा सहभागीहरुले श्रमिकका कारणले उद्योग व्यवसाय बन्द हुने अवस्था नभएको तर सरकारको राजश्वका नीतिका कारण उद्योगीहरुले नै उद्योग बन्द गर्नुपर्ने अवस्था देखिएको बताए। 

कार्यक्रममा परिसंघको रोजगारदाता परिषद्का संयोजक अमित बेगानी, परिसंघका महानिर्देशक दिपकराज जोशी, केन्द्रका महासचिव नवराज दाहाल, महिला समिति सचिव रिता पोखरेल, जेटीयूसीसीमा आबद्ध १० वटा राष्ट्रिय टे«ड युनियन महासंघका अध्यक्ष एवं पदाधिकारीहरु सहभागी थिए।