काठमाण्डौ । पुँजीबजार सुधारका लागि विभिन्न माग राख्दै लगानीकर्ताहरुले आज नेपाल धितोपत्र बोर्ड (सेबोन) अगाडि धर्ना दिएका छन्। 

पुँजीबजार सुधारका लागि ज्ञापनपत्र बुझाउनसँगै वार्तामा बस्न दिउँसो ३ बजे पुगेका सेयरधनीहरुलाई भित्र छिर्न नदिएपछि सेबोन अगाडि धर्ना दिएका हुन्। धर्नामा बसेका लगानीकर्ताहरु सेबोनका निमित्त प्रमुख निरज गिरीको राजीनामा माग गरेका छन्। उनीहरुले अब सेबोनमा स्वच्छ छवि भएका व्यक्तिलाई अध्यक्षमा नियुक्त गर्न पनि सरकारसँग जोडदार माग गरेका छन्।

लगानीकर्ताहरुले बिनाब्रोकर सेयर कारोबार गर्न मिल्ने नियम बनाउन र बैंक शाखाहरुबाट सेयर कारोबार गर्न बैंकहरुलाई लाइसेन्स तथा अनुमति दिनुपर्ने माग अगाडि सारेका छन्।

यसैगरी आफ्नो अख्तियारी दुरुपयोगरी गरी सुनियोजित रुपमा बजार घटाउन लागिपरेका आरोप लगाउँदै लगानीकर्ताहरुले नेपाल राष्ट्र बैंकका गभर्नर महाप्रसाद अधिकारीमाथि छानबिन गर्नुपर्ने माग पनि गरेका छन्। उनीहरुले सीडी रेसियो तत्काल खारेज गर्नुपर्ने माग पनि अघि सारेका छन्।

त्यस्तै विगतमा लगानीकर्ताहरुले गरेका आन्दोलनका मर्मलाई बुझेर त्यतिबेला राखिएका ५८ बुँदे सहमतिलाई अक्षरांश पालना गर्नुपर्ने माग पनि गरेका छन्। 

लघुवित्त कम्पनीहरुले २० प्रतिशतभन्दा माथिको बोनस सेयर वितरण गर्दा ५० प्रतिशतभन्दा माथिको रिजर्भ राख्नुपर्ने अनुचित र अव्यवहारिक व्यवस्थालाई खारेज गर्नुपर्ने लगानीकर्ताको माग छ। 

यसैगरी सेयर धितो कर्जाको सीमा र तोकिएको विद्यमानको १८० दिनको समयावधिलाई संशोधन गरी १२० दिनको औसत मूल्य कायम गर्नुपर्नेलगायत माग पनि लगानीहरुले अगाडि सारेका छन्।