स्थानीय जनप्रनिधिलाई अर्थमन्त्रीको निर्देशन–‘ठूला काम होइन, जनता खुसी हुने साना काम गर्नुहोस्’

काठमाण्डौ । गत ३० वैशाखमा सम्पन्न स्थानीय तहको निर्वाचनबाट रुकुम पश्चिममा निर्वाचित जनप्रतिनिधिहरुसँग अर्थमन्त्री जनार्दन शर्माले अन्तर्क्रिया गरेका छन्। 

मन्त्री शर्माले आफ्नो गृह जिल्लाका नवनिर्वाचित जनप्रतिनिधिसँग शुक्रबार बिहान अर्थ मन्त्रालयमा भेट गरी अन्तर्क्रिया गरेका हुन्। अन्तर्क्रियामा रुकुम पश्चिमका नगरपालिका प्रमुख तथा उप्रमुख, गाउँपालिका अध्यक्ष तथा उपाध्यक्ष, वडाध्यक्ष र वडासदस्यलगायतको उपस्थिति थियो।

जनप्रतिनिधिलाई सम्बोधन गर्दै अर्थमन्त्री शर्माले पालिकाभित्रका स्थानीयलाई ठूला कामको सपना नदेखाउन आग्रह गरे। ‘तपाइँहरुले स्थानीय जनतालाई ठूला काम गर्ने भनेर सपना नबाँड्नुहोस्। त्यस्ता काम गर्नेतिर पनि नलाग्नुहोस्’, उनले भने, ‘स्थानीय जनतालाई स–साना काम गरेरै खुसी बनाउनुहोस्। स्थानीयको दैनिकीसँग जोडिएको आवश्यकताहरु पूरा गरेर सबैको मन जित्ने काम गर्नुहोस्।’

शर्माले स्थानीयको आवश्यकताका आधारमा पहिचान भएका ठूला परियोजना प्रदेश र संघले बनाउने पनि जानकारी दिए। पालिका तथा वडा कार्यालय आउने स्थानीयलाई कामको सहजीकरण गर्न छुट्टै कर्मचारीको व्यवस्था गर्न पनि उनले निर्देशन दिए। ‘कार्यालयमा सेवाग्राही आउनासाथ नमस्ते गर्दै स्वागत गर्न एउटा कर्मचारी राख्नुहोस्। ती कर्मचारीलाई सेवाग्राही के कामका लागि आएको हो, त्यो काम तुरुन्त गराउन सहजीकरण गर्न लगाउनुहोस्’, उनले भने, ‘तपाइँहरु (जनप्रनिधि) पनि नमस्ते खाएर बस्ने होइन, विकास निर्माणको कामको निरन्तर अनुगमन गर्नुहोस्।’

संघ र प्रदेशले बनाएका परियोजनाको निरन्तर अनुगमन, मूल्यांकन र खबरदारी गर्ने काम स्थानीय तहको भएकाले त्यस्तो जिम्मेवारी पूरा गर्न पनि शर्माले निर्देशन दिए। त्यस्तै प्रत्येक हप्ता जनताका बीच गएर अन्तर्क्रिया, भेटघाट र सामीप्यता बढाउन उनले सुझाव दिए। 

मन्त्री शर्माले स्थानीयस्तरका बारेमा पर्याप्त ज्ञान राख्न, वडा सदस्यहरुलाई विभिन्न समिति बनाई जिम्मेवारी दिन, विकास–योजनाका बारेमा जिल्लास्तरका कर्मचारीहरुसँग छलफल गर्न, जनप्र्रतिनिधिलाई नैतिक आचरणबारे प्रशिक्षण दिन, दुई वा सोभन्दा बढी पालिकास्तरमा समन्वय गरी काम गर्नुपर्नेलगायतका सुझाव पनि दिए। 

छलफलमा जनप्रतिनिधिहरुले बजेटको पर्याप्तता, स्थानीय बासिन्दाको आवश्यकतालगायतका बारेमा जानकारी गराएका थिए।