स्पर्शको आइपीओमा ओइरिए लगानीकर्ता, पहिलो दिन नै ८.३३ गुणा बढी आवेदन

काठमाण्डौ । स्पर्श लघुवित्त वित्तीय संस्था लिमीटेडको आइपीओ लगानीकर्ता ओइरिएका छन् । 

यो कम्पनीले आइतबारदेखि निश्कासन गरेको आइपीओमा पहिलो दिन नै माग भन्दा ८.३३ गुणा बढी आवेदन परेको हो । 

कम्पनीले सर्वसाधारणका लागि २ लाख ५२ हजार कित्ता आइपीओ निश्कासन गरेको हो । जसमा पहिलो दिन ७५ हजार आवेदकबाट २१ लाख कित्ताका लागि आवेदन परेको हो । यो भनेको ८.३३ गुणा बढी हो । 

कम्पनीले सर्वसाधारणका लागि निश्कासन गरेको आइपीओमा फागुन २९ गतेभित्र आवेदन दिन सकिनेछ । 

यो कम्पनीले कुल २ लाख ६९ हजार ६३० कित्ता आइपीओ निश्कासन गरेको हो, जसमध्ये ०.५ प्रतिशतले हुन आउने ४ हजार १४८ कित्ता कम्पनीका कर्मचारीका लागि, ५ प्रतिशतले हुन आउने १३ हजार ४८२ कित्ता म्युचुअल फण्डहरुका लागि र बाँकी रहेको २ लाख ५२ हजार सर्वसाधारणका लागि सुरक्षित गरिएको छ । 

इच्छुकले न्यूनतम १० देखि अधिकतम १३४० कित्तासम्मका लागि आवेदन दिन सक्नेछन् ।  

प्रतिकित्ता १०० रुपैयाँ दरले आइपीओ निश्कासन भएकोले साथमा १ हजार रुपैयाँ हुनेले समेत आवेदन दिन सक्नेछन् । यसको अर्थ पढ्दै गरेका विद्यार्थी र न्यून आम्दानी हुनेले समेत यो कम्पनीको आइपीओमा आवेदन दिन सक्नेछन् । 

आइपीओको निश्कासन तथा बिक्री प्रबन्धकमा सानिमा क्यापिटल लिमीटेड रहेको छ । 

यो कम्पनीले यसअघि २ लाख ४० हजार कित्ता आइपीओ निश्कासनको योजना बनाए पनि धितोपत्र बोर्डको निर्देशनपछि कित्तामा संसोधन गरेको थियो ।

आइपीओ निश्कासनपछि कम्पनीको चुक्तापूँजी बढेर ८ करोड २९ लाख पुग्नेछ । यस्तै, कम्पनीका सर्वसाधारणको सेयर स्वामित्व ३२.५ प्रतिशत र प्रोमोटरको ६२.५ प्रतिशत कायम हुनेछ ।

तीन करोड भन्दा कम मूल्यको आइपीओलाई क्रेडिट रेटिङ गराउनु नपर्ने व्यवस्था छ । 

माइक्रोफाइनान्स कम्पनीको सेयर भएकोले आइपीओमा मरिहत्ते गर्नु नै उचित हुनेछ । 

यो माइक्रोफाइनान्स कम्पनीले हाल १० जिल्लाका १५ शाखाबाट आफ्नो कारोबार संचालन गरिरहेको छ ।