काठमाण्डौ । विश्व पर्यटन दिवसको अवसरमा नेपाल उद्योग परिसंघको पर्यटन परिषद्ले नेपालको कला–संस्कृतिलगायत नयाँ पर्यटकीय सम्भावनाहरु उजागर गर्ने विषयसँग सम्बन्धित रहेर एक कार्यक्रमको आयोजना गरेको छ। 

कार्यक्रममा परिसंघका अध्यक्ष विष्णुकुमार अग्रवालले विदेशी मुद्रा आर्जनको महत्वपूर्ण स्रोत पर्यटन पनि भएको बताए। विदेशी मुद्रा भित्र्याउन पर्यटन दिगो र भरपर्दो स्रोत भएकाले पर्यटन उद्योगको प्रवर्द्धन र विकासलाई प्राथमिकता दिनुपर्नेमा उनले जोड दिए। 

रोजगारीका लागि विदेसिन बाध्य जनशक्तिलाई नेपालमै सम्मानजनक र राम्रो आयसहितको रोजगारी दिलाउन पनि पर्यटन क्षेत्रको उन्नत विकासले महत्वपूर्ण भूमिका खेल्ने अग्रवालले बताए। 

परिसंघको उपाध्यक्षसमेत रहेका परिसंघ पर्यटन परिषद्का सभापति राजबहादुर शाहले कोभिड १९ को असरबाट विस्तारै बाहिर आएको निजी क्षेत्रलाई बलियोसँग उभिएर पर्यटन क्षेत्रलाई नयाँ उचाइमा पुर्याउन सरकारले नीतिगत सहयोग गर्नुपर्ने बताए। नागरिकस्तरबाट पनि कोभिडका बेलामा बढेको आन्तरिक घुमफिरको ट्रेन्डले निरन्तरता पाउन सके पर्यटन व्यसायीहरुलाई नयाँ गन्तव्यहरु खोज्न, नयाँ प्रडक्ट, प्याकेजहरु ल्याउन उत्साह मिल्ने उनले बताए। 

यस वर्षको विश्व पर्यटन दिवसको नारा ‘रिथिंकिङ टुरिज्म’ रहेको सन्दर्भमा परिसंघको पर्यटन परिषद्ले तयार पारेको नेपालको आगामी पर्यटनको कार्यदिशासम्बन्धी सुझावात्मक योजना परिसंघका महानिर्देशक दिपकराज जोशीले प्रस्तुत गरे। उक्त सुझाव पर्यटनसँग सम्बद्ध निजी तथा सरकारी निकायहरुलाई उपलब्ध गराइनेछ। 

कार्यक्रममा पर्यटन व्यवसायसँग सम्बन्धित संघसंस्था, नेपालस्थित राजदूत एवं विकास साझेदार प्रतिनिधि तथा उद्योगीव्यवसायीका प्रतिनिधिमूलक संघसंस्थाका प्रतिनिधिको सहभागिता थियो। उक्त अवसरमा सुरु हुँदै गरेका चाडपर्वको शुभकामना आदनप्रदान पनि गरिएको थियो। 

समृद्ध मुलुक निर्माणका लागि पर्यटन पनि महत्वपूर्ण एवं भरपर्दो आधार भएकाले यसको विकास एवं विस्तारमा नेपालको निजी क्षेत्रले थप योगदान गर्ने विश्वासका परिसंघले उक्त अवसरमा शुभकामना पनि व्यक्त गरेको थियो।