काठमाण्डौ । थापाथलीस्थित नर्भिक इन्टरनेसनल हस्पिटलले आफ्नो सेवा र संरचनालाई समयअनुकूल स्तरीय बनाउँदै लैजाने रणनीतिअनुसार आईपीडी (इन प्यासेन्ट डिपार्टमेन्ट) लाई स्तरोन्नति गर्दै अझ स्तरीय बनाएको छ।

ओपीडीबाट सुरु भएको नर्भिकको स्तरोन्नति गर्ने काम अझै जारी छ। यो क्रममा आईपीडीलाई अझ स्तरीय र आधुनिक बनाइएको हो।

गत फागुन ९ गतेदेखि नर्भिकले आधुनिक र पूर्ण डिजिटाइज्ड ओपीडी सञ्चालनमा ल्याएको थियो।  सोहीबेला भएको घोषणाअनुसार अस्पतालका अन्य युनिटहरुको समेत स्तरोन्नति गर्ने क्रममा आईपीडीलाई पनि आधुनिक बनाइएको हो। 

योसँगै अब नर्भिकको आईपीडीमा भिजिट गर्ने बिरामी, तिनका आफन्त र सर्वसाधारणले अन्य अस्पतालभन्दा फरक अनुभूति गर्नेछन्।

नर्भिकले आईपीडीका सबै संरचनाहरुमा आमूल स्तरोन्नति गर्दै विश्वस्तरीय बनाएको हो। 

पुनर्निर्माण गरिएको आईपीडीमा बिरामी, तिनका आफन्त र सर्वसाधारणको सहजता र सुविधालाई विशेष ध्यानमा राखिएको छ। स्तरीय सुविधाहरुलाई थप गरिएको छ भने प्रतिक्षालयदेखि बेडहरुलाई समेत पहिलाभन्दा स्तरीय बनाइएको छ। 

आईपीडीका सबै कोठाहरु आधुनिक साजसज्जाले सजाइएको छ। पूर्ण रुपमा विश्वस्तरीय, बिरामीमैत्री र बिरामीका कुरुवा तथा भिजिटरहरुलाई समेत सहज हुने हिसाबले पुनर्निर्माण गरी स्तरोन्नति गरिएको नर्भिक अस्पतालका प्रमुख कार्यकारी अधिकृत अजयकुमार मिश्रले जानकारी दिए। 

मिश्रका अनुसार नर्भिकले आफ्नो सम्पूर्ण सेवालाई पूर्ण रुपमा डिजिटाइज्ड गरी अत्याधुनिक बनाउने कामको ओपीडीबाट सुरुआत गरेको थियो। त्यसकै निरन्तरताका रुपमा आईपीडी समेत पुनर्निर्माण भएको हो। 

अत्याधुनिक आईपीडीमा आधुनिक लुक्सका साथमा पहिलाभन्दा अझ स्तरीय सेवा, स्मार्ट स्वास्थ्यकर्मी तथा कर्मचारीहरुको व्यवस्था गरिएको छ। अस्पतालमा बिरामीले पैसा तिरेपछि सोहीअनुसारको सेवा पाउन सकून् भन्ने उद्देश्यले नर्भिकको सेवालाई अत्याधुनिक बनाउने अभियान थालिएको उनले जानकारी दिए। 

‘अस्पताल हाताभित्र पुग्दा दुर्गन्ध आउने, मानिसहरुको अव्यवस्थित भीडभाड देखिने परम्परावादी दृश्यहरु कसैले देख्न नपरोस् भन्ने हाम्रो उद्देश्य हो’, मिश्रले भने, ‘यही उद्देश्यले हामीले कोरोना संक्रमणका कारण चौपट बनेको विजिनेश लयमा फर्किन मुश्किल परिरहेको अवस्थामा समेत बिरामीको हितलाई सर्वोपरि मान्दै ठूलो लगानी थपेर यो काम गरेका हौँ।’

नर्भिकले हालसम्म ओपीडी र आईपीडीको विश्वस्तरीय रुपमा पुनर्निर्माण र डिजिटाइज्ड गरे पनि यो अभियान जारी राख्ने र अन्य विभाग तथा सम्पूर्ण अस्पताललाई नै यही ढंगले परिवर्तन गरी सेवालाई पूर्ण आधुनिक, समयसापेक्ष र डिजिटाइज्ड बनाउने योजना बनाएको छ।