काठमाण्डौ । अपर तामाकोशीले सर्वसाधारणका लागि खुलाएको आइपीओमा दोश्रो दिनसम्म मागभन्दा बढी आवेदन परेको छ । 

बिक्री प्रबन्धक नागरिक लगानीकोषका सेयर शाखा प्रमुख रोशनजंग कार्कीका अनुसार दोश्रो दिन शुक्रबार दिउँसो ३ बजेसम्म १ लाख ७ हजार ४ सय ६० आवेदकबाट २ अर्ब ७ करोड ६८ लाख रुपैयाँ बराबरको आइपीओ खरीदको आवेदन दिएका हुन् । 

पहिलो दिन देशभरबाट ४१ हजार बढी आवेदकबाट ८२ लाख ३५ हजार भन्दा बढी कित्ताका लागि आवेदन थियो । 

यो कम्पनीले बिहीबारदेखि १ करोड ५८ लाख ८५ हजार कित्ता साधारण सेयर निश्कासन गरेको हो । दोश्रो दिनसम्ममै मागभन्दा बढी आवेदन परिसकेका कारण अन्तिम दिनसम्म कम्पनीको आइपीओमा थामिनसक्नु आवेदन पर्ने उच्च संभावना देखिन्छ । 

आइपीओमा छिटोमा कात्तिक १९ गतेसम्म आवेदन दिइसक्नुपर्नेछ । यसको अर्थ आवेदन दिने समय अझै २ दिन बाँकी छ । 

कम्पनीले आफ्नो चुक्तापूँजीको १५ प्रतिशतको हिसाबले सर्वसाधारणका लागि सेयर निश्कासन गरेको छ । 

सेयरको निश्कासन तथा बिक्री प्रबन्धकमा नागरिक लगानीकोष र सनराइज क्यापिटल लिमीटेड रहेका छन् । 

यसअघि कम्पनीले सञ्चयकोषका कर्मचारी, कर्जा प्रदान गर्ने संस्थाका कर्मचारी र नेपाल विद्युत प्राधिकरणका कर्मचारीका लागि २ अर्ब ५३ करोड रुपैयाँ बराबरको २ करोड ५३ लाख साधारण सेयर निश्कासन गरेको थियो । 

त्यो भन्दा अझ अघि जलविद्युत कम्पनीले १ अर्ब ५ करोड रुपैयाँ बराबरको आयोजना प्रभावित दोलखा जिल्लाबासीका लागि सेयर निश्कासन गरेको थियो । 

सर्वसाधारणले यो आयोजनाको आइपीओमा न्यूनतम ५० कित्तादेखि अधिकतम १ हजार कित्तासम्मका लागि आवेदन दिन सक्नेछन् ।

यो कम्पनीको सेयरमध्ये ५१ प्रतिशत हिस्सा नेपाल विद्युत प्राधिकरण, नेपाल टेलिकम, नागरिक लगानीकोष र राष्टिय बिमा संस्थानको नाममा रहेको छ । यीमध्ये सबैभन्दा बढी विद्युत प्राधिकरणको ४१ प्रतिशत सेयर स्वामित्व रहेको छ। 

यस्तै, सर्वसाधारण र दोलखाबासीको कम्पनीमा क्रमशः १५ र १० प्रतिशत सेयर हिस्सा कायम हुनेछ भने बाँकी रहेको २४ प्रतिशत हिस्सा कर्मचारी सञ्ययकोषका सञ्चयकर्ता, विद्युत प्राधिकरणका कर्मचारी, कम्पनीका कर्मचारी र कर्जा प्रदान गर्ने निकायका कर्मचारीको नाममा रहनेछ ।

इक्रा नेपालले यो कम्पनीको आइपीओलाई ग्रेड फोरको रेटिङ प्रदान गरेको छ । यसको अर्थ कम्पनीको आधारभूत अवस्था औसत भन्दा कमजोर छ भन्ने हो । 

यो कम्पनीले ४५६ मेगावाट क्षमताको आयोजना बनाइरहेको छ । यो कम्पनीको चुक्तापूँजी १० अर्ब ५९ करोड रहेको छ । यो देशकै सबैभन्दा ठूलो जलविद्युत आयोजना हो ।