काठमाण्डौ । नेपाल उद्योग वाणिज्य महासंघको आसन्न निर्वाचनमा वरिष्ठ उपाध्यक्षका प्रत्याशी उमेशलाल श्रेष्ठले आफू व्यवसायीको समस्यामा पहल गर्न वा आश्वासन दिन मात्रै नभई व्यवसायीका वास्तविक समस्या हल (समाधान) गर्न अधि बढेको भन्दै आफ्नो जित सुनिश्चित भएको बताएका छन्। ‘अहिले धेरै साथिहरुले व्यवसायीको समस्या सुनिरहेको छु वा समस्या समाधान गर्न पहल गरिरहेको छु भन्ने आश्वासन दिइरहनुभएको छ,’ निर्वाचन सम्बन्धी छलफल कार्यक्रममा उनले भने, ‘म उद्योगी व्यवसायीहरुलाई झुटा आश्वासन दिन्न र कुनै पनि समस्याको विषयमा पहल मात्रै होइन सम्बन्धित निकायमा पुर्याएर हल गर्नेछु।’

पछिल्लो समय सरकारले व्यवसायीका वास्तविक समस्याको विषयमा समेत सुनुवाइ नगरेको भन्दै श्रेष्ठले त्यसका लागि दरिलो महासंघ चाहिएको तर्क गरे। ‘मलाई अन्धो, बहिरो र लंगडो महासंघ चाहिएको छैन’, उनले भने, ‘महासंघ नेतृत्वले उद्योगी–व्यवसायीको समस्या देख्ने, सुन्ने र समाधानका लागि सम्बन्धित निकायमा लिएर हिँड्नसक्ने हुनुपर्छ।’ 

अहिले महासंघमा उद्योगी–व्यवसायीको समस्यालाई सरकारसँग निडर र निर्धक्क भएर राख्नसक्ने व्यक्तिको आवश्यकता भएको र उक्त व्यक्ति आफू भएको समेत श्रेष्ठको भनाइ थियो। अहिले महासंघले प्रदेश, जिल्ला नगर, वस्तुगत संघ र एसोसिएट्स सदस्यहरुबीच समन्वय गरेर व्यवसायीका वास्तविक समस्या समाधान गर्न भन्दै उनले जबसम्म जिल्ला नगर तथा वस्तुगतका साथीहरुले महासंघको केन्द्रीय नेतृत्वलाई गाली गर्ने अवस्था आइरहन्छ तबसम्म महासंघ सुधार भएको नमानिनेसमेत दाबी गरे। 

अहिले महासंघको पुरानो गरिमामा आँच आएको भन्दै श्रेष्ठले आफूलाई वरिष्ठ उपाध्यक्षमा जिताएर पठाएको अवस्थामा उक्त गरिमालाई उच्च बनाउँदै सम्मानित व्यवसायी बनाउने प्रतिबद्धता व्यक्त गरे। ‘राज्यलाई सबैभन्दा बढी योगदान दिँदै आएको हामी निजी क्षेत्रलाई हेर्ने नजर एकदमै गलत छ भने जाजय माग राख्दा पनि सरकारले सुनुवाइ गरिहेको छैन’, उनले भने, ‘हामीले राज्यसँग माग्ने होइन देशको अर्थतन्त्र सुधारका लागि राज्यले हामीसँग सल्लाह सुझाव माग्न आउने अवस्था बनाउने छु।’ 

उक्त सुधारका लागि महासंघको आसन्न निर्वातमा आफूलाई वरिष्ठ उपाध्यक्षमा जिताएर पठाउनसमेत श्रेष्ठले उद्योगी–व्यवसायीलाई आग्रह गरे।

महासंघको निर्वाचनमा सबैभन्दा बढी मतभार जिल्ला तथा नगरको रहन्छ भने कम मतमा बढी भार भएका कारण वस्तुगत संघलाई पनि बढी महत्व दिइँदै आएको छ। लामो समय भ्रमण गरी जिल्लाका समस्याहरुलाई नजिकसँग बुझेको र वस्तुगत संघमा आफू नै लामो समयदेखि रहँदै आएका कारण सो क्षेत्रको आफूलाई बढी मत आउने श्रेष्ठ बताउँछन्। 

यस्तै भर्खरै सम्पन्न महासंघको प्रदेश निर्वाचनमा पनि उमेशलाल समुहका व्यवसायीहरु अध्यक्षमा निर्वाचित भएका थिए। नवनिर्वाचित प्रदेश अध्यक्षहरुको केन्द्रीय निर्वाचनमा ठूलो भूमिका रहने भएकाले पनि पहिले चरणमै उनले जित्नसक्ने सम्भावना उच्च रहेको सम्बद्ध उद्योगी–व्यवसायीहरु बताउँछन्। 

यसैगरी एसोसिएट्समा पनि उमेशलालको समूहबाट महासंघको आगामी अध्यक्ष चन्द्रप्रसाद ढकालले समर्थन गरेको भरतराज आचार्यले उपाध्यक्षमा उम्मेदवारी दिएकाले अन्य प्रतिस्पर्धीतको तुलनामा उमेशलला वलियो रहेको सम्बद्ध व्यवसायीहरुको विश्लेषण रहेको छ।