सिद्धार्थ बैंकले साना तथा मझौला उद्यमका लागि रु. २ देखि ४० लाखसम्म कर्जा दिने,कर्जाको अवधि १० वर्ष हुने

काठमाण्डौ । जर्मन सरकारको सहयोगमा  SEDRA-II (Sustainable Economic Development in Rural and Semi-Urban Areas)  प्रोजेक्टका लागि  सिद्धार्थ बैंक लिमिटेड, नेपाल राष्ट्र बैंक र के.एफ.डब्लु डेभलपमेन्ट बैंक बीच हालै एक त्रिपक्षीय सम्झौता भएको छ । उक्त सम्झौता पत्रमा सिद्धार्थ बैंकका तर्फबाट प्रमुख कार्यकारी अधिकृत शम्भु नाथ गौतम र नेपाल राष्ट्र बैंकका तर्फबाट लघुवित्त संस्था सुपरिवेक्षण विभाग प्रमुख डा. प्रकाश कुमार श्रेष्ठले हस्ताक्षर गरे ।

यस प्रोजेक्ट नेपाल सरकार, अर्थ मन्त्रालय र जर्मन सरकारको समन्वय एवं जर्मन वित्तीय विकास निगमको  सहयोगमा भएको हो जसमा नेपाल सरकारको तर्फबाट नेपाल राष्ट्र बैंक मार्फत वाणिज्य बैंकमध्येबाट सिद्धार्थ बैंक र जर्मन सरकारको तर्फबाट के. एफ. डब्लु डेभलपमेन्ट बैंकद्वारा कार्यान्वयन गर्ने गरी नेपालको ग्रामीण तथा अर्धशहरी क्षेत्रको दिगो आर्थिक विकासका लागि लघु तथा साना व्यवसायीहरुलाई प्रत्यक्ष कर्जा सुविधा र तालिम, परामर्श लगायत आवश्यक प्राविधिक सेवाहरु प्रदान गर्नेछ ।

यस परियोजना अन्तर्गत जर्मन आर्थिक सहयोग कार्यान्वयन गर्दै बैंकले लघु, साना तथा मझौला उद्यम वित्तीयका लागि रु दुई लाख देखि रु चालीस लाख सम्मको कर्जा सुविधा प्रदान गर्नेछ र सो कर्जाको अवधि १० वर्ष सम्मको हुने बताइएको छ । लघु, साना तथा मझौला उद्यमीहरुलाई सीपमुलक तालिम, परामर्श एवं अन्य प्राविधिक सहयोग समेत ग्राहकहरुलाई प्रदान गरिनेछ ।

यस योजनाले ग्रामीण तथा अर्धशहरी क्षेत्रका लघु, साना तथा मझौला उद्यमीहरुलाई उद्यमशीलता विकासको लागि आवधिक कर्जाका साथै सीपमुलक तालिम प्रदान गर्ने बैंकको मुख्य उद्देश्य रहेको छ ।

विपन्न, सीमान्तकृत समुदाय तथा लक्षित वर्गलाई वित्तीय सेवा प्रदान गर्ने बैंकको मुख्य प्राथमिकता रहेकाले यस सम्झौताले सिद्धार्थ बैंक र के.एफ.डब्लु डेभलपमेन्ट बैंक बिचको सहकार्य अझ सुदृढ बनाउने र नेपालको लघु, साना तथा मझौला उद्यम वर्गहरुको विकासमा थप टेवा पुग्ने विश्वास बैेंकले लिएको छ ।