इथोपियामा बिमान क्र्यास: १५७ यात्रुको निधन

इथोपिया । इथोपियन एयरलाइन्सको जेट बिमान क्र्यासमा सबै यात्रुको मृत्यु भएको छ । 

बीबीसीले एयरलाइन्सस्थित विश्वस्त स्रोतलाई उद्धृत गर्दै जनाए अनुसार बिमानमा रहेका १४९ यात्रु र चालक दलका ८ सदस्यसहित कुल १५७ जनाको बिमा दुर्घटनामा मृत्यु भएको हो । 

इटी ३०२ नम्बरको यो जेट बिमान आडिस अबाबाबाट केन्याको नैरोबी जाँदै थियो । 

एयरलाइन्सका अनुसार विभिन्न ३३ देशका नागरिकले सो विमानबाट यात्रा गरिरहेका थिए । 

स्थानीय समयअनुसार आइतबार बिहान ८.४४ मा बिमान क्र्यास भएको थियो । इथोपियन राजधानीबाट बिमान उडेको ६ मिनेटमै क्र्यास भएको समाचारमा जनाइएको छ ।

दुर्घटना के कारणले भएको हो भन्ने बिषय अझै प्रष्ट भइसकेको छैन । 

इथोपियाका प्रधानमन्त्री अबी अहमतको अफिसियल ट्वीटरमा सो जेट बिमानमा यात्रा गरिरहेकाहरुप्रति श्रद्धाञ्जलीसँगै दिवंगतहरुको परिवारमा समवेदना प्रकट गरिएपछि मात्र बिमानमा यात्रारत सबैको निधन भएको आधिकारिक पुष्टि भएको थियो ।

यसअघि भने एयरलाइन्सले जेट बिमान वेपत्ता भएको भन्दै खोजी तथा उद्धार कार्य जारी राखिएको बताएको थियो । 

बिमान इथोपियाको राजधानीबाट ६० किलोमिटरमा अवस्थित विशोफ्टू भन्ने ठाउँमा गएर क्र्यास भएको थियो ।