काठमाण्डौ । कञ्चनपुर जिल्लामा आवश्यक रगतको अभाव हुन नदिन प्रभु बैंकको सामाजिक उत्तरदायीत्व अन्तरगत शनिवार भीमदत्त नगरपालिका १८ स्थित बैंक प्राङ्गणमा रक्तदान कार्यक्रम आयोजना गरिएको छ । 

महेन्द्रनगर जेसिस र नेपाल रेडक्रस सोसाईटी जिल्ला शाखा, कञ्चनपुरको सहकार्यमा आयोजित रक्तदान कार्यक्रमको उद्घाटन बैंकका महेन्द्रनगर शाखाका प्रबन्धक बिकेशकुमार श्रेष्ठले रक्तदानसँगै गरेका थिए । 

प्रभु बेैंकले देशका विभिन्न भागहरुमा विभिन्न खालका सामाजिक गतिविधिहरु जस्तै, अनाथ र अपाङ्गहरुलाई छात्रवृत्ति, निशुल्क स्वास्थ्य जाँच, रक्तदान जस्ता कार्यक्रम संचालन गर्दै आइरहेको छ । 

पछिल्लो समय कञ्चनपुर र आसपासको क्षेत्रका ब्लड बैंकमा देखिएको रगतको कमीलाई मध्यनजर राख्दै आफ्नो तर्फबाट समाजमा सकारात्मक योगदान गर्नु यस अभियानको मुख्य उद्देश्य रहेकोे बैंकले जनाएको छ । 

रक्तदान जीवनदान भन्ने मूल नाराका साथ संचालित यस कार्यक्रममा १०० जना भन्दा बढी सहभागी भई २५ जना भन्दा बढीले रगत दान गरेका थिए ।