भारतको कोरोना दोश्रो लहर जुलाईसम्म रोकिने, त्यसको ६–८ महिनाभित्र तेश्रो लहर

काठमाण्डौ । भारतमा तीव्र बनेको कोरोनाको दोश्रो लहर यो वर्षको जुलाईसम्म रोकिनसक्छ । र, त्यसको करिब ६ देखि ८ महिनाभित्र कोरोनाको तेश्रो लहर सुरु हुनसक्छ । यस्तो प्रक्षेपण भारत सरकारको विज्ञान मन्त्रालयअन्तर्गतको विज्ञान तथा प्राद्यौगिक विभागबाट गठित वैज्ञानिक सम्मिलित तीन सदस्यीय प्यानलले सार्वजनिक गरेको हो । सो प्यानलले आफ्नो प्रक्षेपण सार्वजनिक गर्दै भारत सरकारलाई अलर्ट समेत गराएको छ । 

एक अन्तर्राष्ट्रिय मोडल सूत्र SUTRA(संवेदनशील, अनिर्धारित, परीक्षण(सकारात्मक) तथा हटाइएको दृष्टिकोण)को प्रयोग गरी वैज्ञानिकहरुले भविष्यवाणी गरेका छन् कि मे महिनाको अन्तसम्म भारतमा प्रतिदिन १.५ लाख कोरोना संक्रमित थपिनेछन् । जून महिनाको अन्तसम्म दैनिक २० हजारसम्म मात्र संक्रमित थपिनेछन् । जुलाईसम्म दोश्रो लहर थामिनसक्छ । 

सो प्यानलका एक सदस्य तथा आइआइटी कानपुरका प्रोफेसर मनिन्द्र अग्रवालले भनेका छन् कि महाराष्ट्र, उत्तरप्रदेश, कर्नाटक, मध्यप्रदेश, झारखण्ड, राजस्थान, केरला, सिक्किम, उत्तराखण्ड, गुजरात, हरियाणा बाहेक दिल्ली र गोवा जस्ता राज्यहरुमा कोरोनाको दोश्रो लहरको पीक आइसकेको छ । तमिलनाडूमा मे २९ देखि ३१ सम्म र पुडुचेरीमा मे १९ देखि २० सम्म पीक आइसक्नेछ । 

भारतको पूर्वी तथा पूर्वोत्तर राज्यहरुमा भने अझै पीक आउन बाँकी रहेको मिडिया रिपोर्टमा उल्लेख गरिएको छ । आसाममा मे २० देखि २१ सम्म, मेघालयमा ३० मेसम्म, त्रिपुरामा २६ देखि २७ मेसम्म पीक आउनसक्नेछ । हिमाञ्चल तथा पञ्जाब प्रदेशमा अझै कोरोना संक्रमित बढ्ने क्रम जारी रहेको छ । हिमाञ्चल प्रदेशमा मे २४ सम्म तथा पञ्जाबमा २२ मेसम्म दोश्रो लहरको पीक आउनसक्छ । 

सूत्र(SUTRA) मोडलजस्तो गणितीय मोडल महामारीको तीव्रताको अनुमान लगाउन निकै सहयोगी सिद्ध मोडल हो । यो मोडल गत वर्ष कोरोनाको प्रभाव अध्ययन गर्नका लागि भारतले विकास गरेको थियो।

सरकारी समितिले तेश्रो लहरको प्रकृति कस्तो हुन्छ भन्ने भविष्यवाणी गर्न भने नसकिने स्वीकार गरेको छ । आइआइटी हैदरावादका प्रोफेसर विद्यासागरलाई उद्धृत गर्दै मिडिया रिपोर्टमा भनिएको छ–‘हामीले यसअघि दोश्रो लहरमा दैनिक १ लाख ५० हजार संक्रमित फेला पर्न सक्छन् भनेर प्रक्षेपण गरेका थियौं, तर हामी गलत सावित भयौं ।’