काठमाण्डौ । देशकै टप जीवन बिमा कम्पनी नेपाल लाइफ इन्स्योरेन्सले चालु आर्थिक वर्षको तेश्रो त्रैमाससम्म १८ अर्ब ४१ करोड बिमाशुल्क आर्जन गरेको छ । 

अघिल्लो वर्षको यही अवधिसम्म कम्पनीले १५ अर्ब १९ करोड बिमा शुल्क आर्जन गरेको छ । बिमाशुल्क आर्जनतर्फको यो बढोत्तरीले कम्पनी प्रगति पथमा लम्किरहेको बुझ्न सकिन्छ । कम्पनीले अघिल्लो वर्षको तुलनामा बिमा शुल्क आर्जनतर्फ २१.२४ प्रतिशतको प्रगति गरेको देखिएको हो । 

समीक्षा अवधिमा कम्पनीले पुनर्बिमा कमिसन आय, लगानी, कर्जा तथा अन्यबाट हुने आय, बिमालेखको धितोमा कर्जाबाट हुने आयमा समेत बढोत्तरी गरेको छ । 

अघिल्लो वर्षको यही अवधिसम्म २ करोड १७ लाखम ासीमित पुनर्बिमा कमिसनको आय बढेर २ करोड ६९ लाख, ३ अर्ब १५ करोडमा सीमित लगानी, कर्जा तथा अन्यबाट हुने आय बढेर ४ अर्ब १० करोड तथा ७७ करोड ७३ लाखमा सीमित बिमालेखको धितोमा कर्जाबाट हुने आय बढेर १ अर्ब १५ करोडको उचाईमा पुगेको हो । 

कम्पनीले समीक्ष्गा अवधिमा ५ अर्ब १९ करोड बढीको दाबी भुक्तानी गरेको छ । यस्तो भुक्तानी अघिल्लो वर्षको यही अवधिमा ६अर्ब ५६करोड थियो । 

समीक्षा अवधिमा नेपाल लाइफ इन्स्योरेन्सले जीवन बिमा कोषको आकार बढाएर ८१ अर्ब  ३७ करोड पुर्याएको छ । अघिल्लो वर्षको यही अवधिसम्म जीवन बिमा कोषको आकार ६० अर्ब ६२ करोडमा सीमित थियो । यो हिसाबले जीवन बिमा कोषतर्फ कम्पनीले ३४.२३ प्रतिशतले छलाङ मारेको देखिएको छ । 

कम्पनीको जगेडा तथा कोष ४ अर्ब ४५ करोड रहेकोमा घटेर २ अर्ब ७३ करोडमा सीमित भएको छ भने महाविपत्ति जगेडाकोषको आकार ४३ करोड ६७ लाखबाट  बढेर ४७ करोड ५७ लाखको उचाईमा पुगेको छ । 

चालु आबको तेश्रो त्रैमाससम्म नेपाल लाइफ इन्स्योरेन्सले ४६ करोड ७५ लाख नाफा आर्जन गरेको छ । अघिल्लो वर्ष यही अवधिसम्म ४६ करोड ७२ लाख नाफा आजृन गरेको थियो । 

समीक्षा अवधिमा नेपाल लाइफको प्रतिसेयर आम्दानी ११.३४ रुपैयाँ(अन्तिम सेयर संख्याको आधारमा गरिएको), प्रतिसेयर नेटवर्थ १५८.३६रुपैयाँ, पीई अनुपात ९२.९२ गुणा, प्रतिसेयर कुल सम्पत्तिको मूल्य १७०१ रुपैयाँ र औसत प्रतिफल १०.०१ प्रतिशत रहेको छ ।