बैंकहरुको निक्षेप घट्यो, सीडी रेसियो बढ्यो

काठमाण्डौ । बैंक तथा वित्तीय संस्थाहरुको निक्षेप संकलन २ दिनमा २ अर्ब रुपैयाँले घटेको छ। 

नेपाल राष्ट्र बैंकको तथ्यांकअनुसार मंसिर ६ गतेसम्म बैंक तथा वित्तीय संस्थाको कुल निक्षेप ४७ खर्ब ९४ अर्ब रुपैयाँ रहेको छ। जुन मंसिर ४ गतेको तुलनामा २ अर्ब रुपैयाँले कम हो। गत मंसिर ४ गते बैंक तथा वित्तीय संस्थाको कुल निक्षेप ४७ खर्ब ९६ अर्ब रुपैयाँ रहेको थियो। 

यसैगरी मंसिर ६ गतेसम्म वाणिज्य बैंकहरुको कुल निक्षेप पनि घटेर ४२ खर्ब २८ अर्ब रुपैयाँमा झरेको छ। गत मंसिर ४ गतेसम्म वाणिज्य बैंकहरुको कुल निक्षेप ४२ खर्ब २९ अर्ब रुपैयाँ थियो। यो हिसाबले वाणिज्य बैंकहरुको निक्षेप १ अर्ब रुपैयाँले घटेको छ। 

राष्ट्र बैंकको तथ्यांकअनुसार मंसिर ६ गतेसम्म वाणिज्य बैंकहरुको कुल कर्जा बढेर लगानी ४० खर्ब ४८ अर्ब रुपैयाँ पुगेको छ। गत मंसिर ४ गतेसम्म वाणिज्य बैंकहरुको कुल कर्जा लगानी ४० खर्ब ४४ अर्ब रुपैयाँ रहेको थियो। कर्जा लगानी भने ४ अर्ब रुपैयाँले बढेको देखिन्छ। 

मंसिर ६ गतेसम्म भने बैंक तथा वित्तीय संस्थाहरुको कुल कर्जा लगानी ४५ खर्ब ५८ अर्ब रुपैयाँ पुगेको छ। जुन गत मंसिर ४ गतेसम्म ४५ खर्ब ५३ अर्ब रुपैयाँ रहेको छ। 

निक्षेप घटेसँगै सीडी रेसियो पनि बढेको छ। गत मंसिर ४ गतेसम्म बैंकहरुको औसत सीडी रेसियो ९०.१८ प्रतिशत रहेकोमा बढेर ९०.३१ प्रतिशत पुगको छ। 

अन्तरबैंक ब्याजदर भने ४.९६ प्रतिशत रहेको छ।