व्यक्तिगत मुद्धतीको 'प्राइस वार'मा नवीलको प्रवेश, ९% ब्याजको अफर

काठमाण्डौ । निजी क्षेत्रको नेतृत्वदायी वाणिज्य बैंक, नवील बैंक लिमीटेडले लामो अवधिको व्यक्तिगत मुद्धती निक्षेपमा ९ प्रतिशत ब्याज अफर गर्दै स्किम सार्वजनिक गरेको छ । 

नवीलले दशैं स्किमको रुपमा यस्तो अफर सार्वजनिक गरेको हो । योसँगै विगत केही दिनअघिदेखि बैंकहरुबीच व्यक्तिगत मुद्धती निक्षेपमा सुरु भएको 'प्राइस वार'मा नवीलको औपचारिक प्रवेश भएको छ । 

न्यूनतम १३ महिनादेखि अधिकतम २४ महिनासम्मको व्यक्तिगत मुद्धती निक्षेपमा ९ प्रतिशत ब्याज पाइने बैंकले जनाएको छ । 

पछिल्लो समय बैंकहरुको बचतको ब्याजदर घटेर न्यून विन्दूमा पुगे पनि व्यक्तिगत मुद्धती निक्षेपको ब्याजदरमा भने 'प्राइस वार' सुरु भएको देखिएको छ । 

नवीलभन्दा अगाडि लामो अवधिको व्यक्तिगत मुद्धती निक्षेपमा सेञ्चुरी बैंकले ९ प्रतिशत ब्याजदर अफर गरी बैंकिंग उद्योगमै तरंग ल्याइदिइसकेको छ । सिभिल बैंकले समेत ८.७५ प्रतिशत ब्याजको अफर गर्दै व्यक्तिगत मुद्धती निक्षेपको प्रचार प्रसार गरिरहेको छ । 

ठूला भनिएका बैंकहरुबाट व्यक्तिगत मुद्धति निक्षेपमा धेरै ब्याज अफर गरेको नवील नै पहिलो बैंक हो । अब नवील नै मैदानमा उत्रिइसकेपछि अन्य बैंकहरुबीच पनि व्यक्तिगत मुद्धति निक्षेपको ब्याजदरमा राम्रै प्रतिस्पर्धा हुने देखिन्छ । 

हाल कर्जाको माग निकै न्यून छ । प्रणालीमा २०० अर्ब बढी अधिक तरलता छ । यस्तो अवस्थामा पनि बैंकहरु मुद्धति निक्षेपमा किन आक्रामक भइरहेका होलान् त ? नवील बैंकका डिजीएम मनोज ज्ञवाली भन्छन्-'अहिले कर्जाको माग नै छैन, तर निक्षेप वृद्धि छ । बजारमा २०० अर्बभन्दा बढीको एक्सेस लिक्वीडिटी छ । फिक्स्ड डिपोजिटलाई बैंकहरुले डिपोजिट मिक्स(निक्षेपको समीश्रण) मिलाउन मात्रै प्रमोट गरेका छन् ।'