काठमाण्डौ । सिद्धार्थ प्रिमियर इन्स्योरेन्स कम्पनीले आर्थिक वर्ष २०७८–७९ को चौथो त्रैमाससम्म ३६ करोड ३५ लाख रुपैयाँ खुद नाफा आर्जन गरेको छ। 

कम्पनीले कमाएको यो मुनाफा अघिल्लो आर्थिक वर्षको तुलनामा भने ४६.६६ प्रतिशतले कम हो। अघिल्लो आर्थिक वर्षको यही अवधिसम्म सिद्धार्थ प्रिमियरले ६८ करोड १५ लाख रुपैयाँमाथि खुद नाफा कमाएको थियो। 

समीक्षा अवधिसम्म कम्पनीको लगानी, कर्जा तथा अन्यबाट हुने आय २६.९५ प्रतिशतले घटेसँगै नाफामा संकुचन आएको हो। यो अवधिसम्म कम्पनीले ८७ करोड ८३ लाख रुपैयाँ यस्तो आम्दानी गरेको छ। अघिल्लो आर्थिक वर्षको यही अवधिसम्म कम्पनीको यस्तो आम्दानी १ अर्ब २० करोड रुपैयाँ रहेको थियो। 

मुख्य सूचकहरुसँगै कम्पनीको निर्जीवन बीमा व्यवसायसमेत खस्किएको छ। अघिल्लो आर्थिक वर्षमा १ अर्ब ७७ करोड ५ लाख रुपैयाँ प्रिमियम कलेक्सन गरेको सिद्धार्थ प्रिमियरले गत आर्थिक वर्षको अन्त्यसम्म १ अर्ब १४ करोड ६ लाख रुपैयाँ मात्रै प्रिमियम कलेक्सन गरेको छ। बीमा शुल्क आर्जनमा संकुचन आएसँगै कम्पनीको बीमा दाबी भुक्तानीसमेत ०.६४ प्रतिशतले घटेर ७९ करोड ८० लाख रुपैयाँमा सीमित भएको छ। 

कम्पनीले बीमा कोषको आकार भने १४.२१ प्रतिशतले बढाएर २ अर्ब ५० करोड रुपैयाँ सञ्चित गर्न सफल भएको छ। जगेडा कोषको आकारसमेत २६.१२ प्रतिशतले बढेर कोषमा ८९ करोड ५६ लाख रुपैयाँ सञ्चिति रहेको छ। बीमा कोष र जगेडा कोषको आकार वृद्धि हुँदा महाविपत्ति कोषको आकार भने ९.५४ प्रतिशतले घटेर १३ करोड ८० लाख रुपैयाँमा खुम्चिएको छ। 

चुक्तापुँजी २ अर्ब ८० करोड रुपैयाँ रहेको सिद्धार्थ प्रिमियरको कुल २ लाख ७ हजार ५९५ बीमालेख संख्या रहेको छ। कम्पनीको प्रतिसेयर आम्दानी (ईपीएस) १८.८४ रुपैयाँ कायम भएको छ। अघिल्लो आर्थिक वर्ष ईपीएस ५४.२९ रुपैयाँ रहेको थियो। 

यसका साथै कम्पनीको मूल्य आम्दानी अनुपात (पीइ रेसियो) ४१.३१ गुणा, प्रतिसेयर नेटवर्थ २२५.९१ रुपैयाँ, प्रतिसेयर कुल सम्पत्तिको मूल्य ३७५.२८ रुपैयाँ र तरलता अनुपात २.१३ प्रतिशत रहेको छ।