मुक्तिनाथको गज्जब कर्जा योजना: मृत्युपछि ऋणि सदस्यको बाँकी कर्जा मिनाहा, तिरेको साँवा र ब्याज पनि फिर्ता

कास्की । मुक्तिनाथ बिकास बैंकले बैंकबाट ऋण लिएका ग्राहकको मृत्युपश्चात मृतकका आफन्तलाई बाँकी कर्जा मिनाहा गर्दै विगतमा बैंकलाई भुक्तानी भएको साँवा तथा ब्याज पनि फिर्ता हुने नयाँ कर्जा योजना ल्याएको छ । 

यस योजनाअन्तर्गत बैंकबाट सामूहिक जमानी वा व्यक्तिगत जमानतमा बिनाधितो कर्जा लिएका ग्राहकको सो अवधिभित्र मृत्यु भएमा बैंकलाई तिर्न बाँकी रहेको रकम मिनाहा भई सो अवधिमा भुक्तान गरेको सम्पूर्ण रकम मृतकको परिवारलाई फिर्ता हुने व्यवस्था रहेको छ । 

यही व्यवस्था अनुरुप बैंकले कस्कीको माछापुच्छ्रे गाउँपालिका वडा नं ३, घाचोककी बिन्दु कार्कीले साना तथा लघुबैंंकिङ्ग कार्यक्रमअन्तर्गत शाखा कार्यालय हेम्जाको साना तथा लघुबैंकिङ्ग कार्यालयबाट बिनाधितो व्यक्तिगत लघुउद्यम कर्जाअन्र्तगत तरकारी खेती तथा पशुपालन ब्यबसायका लागि २०७४ बैशाख ३ गते लिएको कर्जा रु.२,५०,०००।–(अक्षरेपी दुई लाख पचास हजार रुपैया मात्र )को तिर्न बाँकी रु १२६,४६८.०० (अक्षरेपी एक लाख छब्बिस हजार चारसय अट्सठ्ठी रुपैया मात्र ) मिनाहा गरिदिएको छ ।

यस्तै, हालसम्म उनले भुक्तानी गरेको साँवा तथा ब्याज रु १,५४,३८५ (अक्षरेपी एक लाख चौवन्न हजार तिन सय पचासी रुपैयाँ मात्र) र बैंकले ऋणी सदस्य मृत्यु हुँदा वितरण गर्दै आएको काजकिरिया खर्च स्वरुप रु ५,००० सहित एकमुष्ट रु २,८५,८५३.०० (अक्षरेपी दुई लाख पचासी हजार आठ सय  त्रिपन्न  रुपैयाँ) समेत प्रदान गरेको छ । 

मुक्तिनाथ विकास बैंक लिमिटेडका क्षेत्रिय प्रवन्धक बाबुराम ढकाल, पोखरा अनुगमन अधिकृत नगेन्द्रराज पौडेल, माछापुच्छ्रे  गाउँपालिका वडा नं. ३ का अध्यक्ष सूर्यप्रसाद लम्सालबाट संयुक्त रुपमा मृतकका परिवारहरुलाई चेकमार्फत हस्तान्तरण गरिएको बैंकले एक विज्ञप्तिमार्फत जनाएको छ ।

सो कार्यक्रममा मुक्तिनाथ विकास बैंक लिमीटेडका शाखा प्रमुख सन्तोष शर्मा साना तथा लघुबैंकिङ्ग कार्यालय प्रमुख बालकृष्ण रेग्मी लगायत अन्य कर्मचारी र स्थानीय बासिन्दाले मृतकप्रति समवेदना प्रकट गरेका थिए । 

कार्कीको ५२ बर्षको उमेरमा २०७५ चैत १३ गते स्वास्थ्य उपचारको शिलशिलामा अस्पतालमा निधन भएको थियो ।