कोरोनाविरुद्ध विश्व एकजुट नभए सन् १९०० को जस्तै समस्या आउने विश्व बैंकका पूर्व प्रमुखको चेतावनी

काठमाण्डौ । विश्व बैंकका पूर्व प्रमुखले कोरोनाको संकटलाई विश्वभरका राष्ट्रहरुले एकजुट भई सहकार्य गरेर सामना नगरेर विश्व सन् १९०० को जस्तै देखिनसक्ने बताएका छन् । 

विश्व बैंकका पूर्व प्रमुख रोबर्ट जोइललिकले अमेरिका र चीनबीच अहिले देखिएको तनाव विश्वव्यापी आर्थिक पुनर्उत्थानका लागि गम्भीर बाधाको रुपमा देखिएको बताएका छन् । 

जोइललिक, अमेरिकाको वरिष्ठ सार्वजनिक अधिकारीमध्ये एक हुन् । उनले ६ जना अमेरिकी राष्ट्रपतिहरुको सल्लाहकारको रुपमा समेत काम गरिसकेका छन् । 

बिबिसीसंग कुरा गर्दै उनले कोरोनाले निम्त्याएको मन्दीबाट माथि उठ्ने एउटा मात्रै प्रभावकारी उपाय भनेको विश्वव्यापी सहकार्य रहेको बताएका छन् । यसका लागि उनले अहिलेको मुख्य चिन्ता भनेको अमेरिका र चीन बीचको तनाव रहेको बताएका छन् । 

“मेरो विचारअनुसार अहिले अमेरिका र चीनबीचको सम्बन्ध फ्रि फलको अवस्थामा छ र हामीलाई यो सम्बन्धको न्यूनतम बिन्दु कहाँसम्म छ भन्ने केही पनि ज्ञान छैन र यो एकदमै डरलाग्दो अवस्था हो ।” रोर्बटले बिबिसीको एसिया बिजनेश रिपोर्टरलाई बताए । 

यस क्रममा उनले विश्व सन् १९०० जस्तो देखिन सक्ने चेतावनी समेत दिए । जतिबेला ग्लोबलाइजेशन र राष्ट्रिय स्वार्थका लागि विश्वका शक्तिशाली देशहरुबीच तीव्र प्रतिस्पर्धा हुने गर्दथ्यो । 

रोबर्टले सन् २००७ देखि २०१२ सम्म विश्व बैंकको प्रमुखको रुपमा काम गरेका थिए । उनले कार्यभार सम्हालेको वर्ष विश्वमा आर्थिक मन्दी देखिएको थियो । त्यतिबेला उनले विश्व बैंकका प्रमुखका नाताले मन्दीको अवस्थाबाट विश्वलाई बाहिर निकाल्नका लागि अन्तराष्ट्रिय मुद्रा कोष र विश्वका सरकारहरुसँग नजिक भएर काम गरेका थिए । 

बीबीसीबाट