लकडाउनविरुद्ध न्यूजिल्याण्डका नागरिक मास्क खोलेर सडकमा

काठमाण्डौ । आज(शनिबार) न्यूजिल्याणको अकल्याणमा सरकारविरुद्ध प्रदर्शन भएको छ । सरकारले कोरोनाभाइरस नियन्त्रण गर्न जारी गरेको प्रतिबन्धविरुद्ध हजारौं नागरिकहरु सडकमा उत्रिएका हुन् । 

अकल्याण्ड, न्युजिल्याण्डको सबैभन्दा ठूलो सहर हो, जहाँ गत महिनादेखि कोरोनाभाइरसविरुद्ध प्रतिबन्धहरु लागू गरिएका थिए । 

स्थानीय टेलिभिजनहरुले प्रसारण गरेको समाचारमा मास्क नलगाएका धेरैजसो मानिसहरु विरोधमा उत्रिएको देखिएको छ । विरोधमा उत्रिएकाहरुले आफ्नो अधिकारका लागि सडकमा आउनुपरेको बताएका छन् । 

हजारौं मानिसहरु विरोधमा उत्रिएका भए पनि कसैलाई पनि पक्राउ गरेको रिपोर्ट भने प्रकाशित भएको छैन । 

अक्टोबर १७ मा आम निर्वाचनको सामना गर्न गइरहेकी प्रधानमन्त्री ज्याकिन्डा आर्देनले गत महिनादेखि प्रतिबन्धहरु केही खुकुलो पारेकी थिइन्, तर अहिले पनि सहर २.५ अलर्टमा रहेको छ । जसको अर्थ १० भन्दा बढी संख्यामा मानिसहरु भेला हुन पाउँदैनन् भन्ने हो । सार्वजनिक स्थल र यातायातमा अनिवार्य रुपमा मास्क लगाउनुपर्ने निर्देशिका जारी गरिएको छ । 

शनिबार न्यूजिल्याण्डमा कोरोना भाइरसका दुईवटा केसहरु देखिएका छन् र त्यहाँ कुल संक्रमितको संख्या १४४४ पुगेको छ । २४ जनाको कोरोना संक्रमणबाट मृत्यु भइसकेको छ ।  
-एजेन्सीको सहयोगमा