काठमाण्डौ । नेपाल राष्ट्र बैंकले सूचना प्रविधिलगायतका सेवा निर्यात गर्ने उद्योग तथा व्यवसायलाई उपलब्ध हुने विदेशी मुद्रा सुविधा प्राप्त गर्न ७ बुँदे सर्त अघि सारेको छ। 

राष्ट्र बैंकले विदेशी विनियम कारोबार गर्न इजाजतपत्रप्राप्त निकायका लागि जारी गरिएको एकीकृत निर्देशन परिपत्र, २०७९ मा संशोधन गर्दै यस्तो व्यवस्था थप गरेको हो। 

थप गरिएको व्यवस्थाबमोजिम सूचना प्रविधिलगायत सेवा निर्यात गर्ने उद्योग तथा व्यवसायले विदेशमा सम्पर्क कार्यालय स्थापना गर्ने प्रयोजनका लागि विदेशस्थित आफ्नै बैंक खातामा रकमान्तर गर्न वा सफ्टवेयर, प्रोग्राम वा उपकरण खरिद गरी विदेशमै जडान गर्न अघिल्लो आर्थिक वर्ष आर्जन गरेको विदेशी मुद्राको १० प्रतिशतसम्मको सीममा रही राष्ट्र बैंकले देहायका सर्तहरुका आधारमा वाणिज्य बैंकहरुमार्फत विदेशी मुद्राको सुविधा प्राप्त गर्न सक्ने व्यवस्था गरेको छ–

  • अघिल्लो आर्थिक वर्ष सूचना प्रविधिलगायत सेवा निर्यात गरी आर्जन गरेको विदेशी मुद्रा खुल्ने लेखापरीक्षण गरिएको वित्तीय विवरण र परिवर्त्य विदेशी मुद्राको बैंक खाताको विवरण। भारतमा निर्यात गरी विदेशी मुद्रा आर्जन गर्ने निर्यातकर्ताको हकमा नेरु खाताको विवरण र सम्बन्धित बैंकले जारी गरेको नेरु आर्जनसम्बन्धी प्रमाण।
  • विदेशी मुद्राको सुविधा माग गरिएको रकमसमेत खुल्ने नेपाल सरकारको सम्बन्धित निकायको सिफारिस।
  • यस व्यवस्थाअन्तर्गत विदेशमा खाता खोल्न राष्ट्र बैंकको छुट्टै स्वीकृति आवश्यक पर्ने छैन। 
  • प्रचलित कानुनी व्यवस्थाहरु पालना हुने सम्बन्धमा निवेदकबाट स्वःघोषणा।
  • यस दफामा अन्यत्र जुनसुकै कुरा लेखिएका भए पनि यस दफाअन्तर्गतको विदेशी मुद्राको सीमा अघिल्लो आर्थिक वर्षको कर चुक्ता प्रमाणपत्रमा उल्लिखित करयोग्य आयको २० प्रतिशतभन्दा बढी हुने छैन।
  • यस्तो सुविधाको विवरण संलग्न ढाँचामा बैंक तथा वित्तीय संस्थाले महिना समाप्त भएको ७ दिनभित्र राष्ट्र बैंकको विदेशी विनिमय व्यवस्था विभागमा पेस गर्नुपर्नेछ। 
  • यस्तो सुविधा प्राप्त गर्ने उद्योग तथा व्यवसायले महिना समाप्त भएको ७ दिनभित्र संलग्नबमोजिम ढाँचामा विदेशी विनिमय व्यवस्था विभागमा विवरण पेस गर्नुपर्दछ। 

यसअघि यस्तो व्यवस्था राष्ट्र बैंकले गरेको थिएन।