किसान लघुवित्तको नाफामा २१.६३%को बढोत्तरी, रिजर्भमा २४३.५२%को छलाङ

काठमाण्डौ । किसान लघुवित्त वित्तीय संस्था लिमिटेडले चालु आर्थिक वर्षको दोस्रो त्रैमासको अपरिष्कृत वित्तीय विवरण सार्वजनिक गरेको छ।

संस्थाले समीक्षा अवधिमा ४ करोड ५२ लाख रुपैयाँ खुद नाफा आर्जन गरेको छ। जुन गत वर्षको यही अवधिको तुलनामा २१.६३ प्रतिशतले बढी हो। गत वर्ष यही अवधिमा संस्थाले ३ करोड ७२ लाख रुपैयाँ नाफा आर्जन गरेको थियो।

यो अवधिमा संस्थाको सञ्चालन मुनाफा ८३.२२ प्रतिशतले बढेर ६ करोड ५४ लाख रुपैयाँ भएको छ। गत वर्ष यही अवधिमा यस्तो मुनाफा ३ करोड ५७ लाख रुपैयाँमा सीमित थियो।

यही अवधिमा संस्थाले खुद ब्याज आम्दानीबापत १७ करोड ५१ लाख रुपैयाँ आर्जन गरेको छ। यस्तो आम्दानी गत वर्ष यही अवधिमा १७ करोड १० लाख रुपैयाँ रहेको थियो।

चुक्तापुँजी ३९ करोड २८ लाख रुपैयाँ रहेको संस्थाले चालु आर्थिक वर्षको ६ महिनामा ५ अर्ब ११ करोड रुपैयाँ सापटी लिई ६ अर्ब ७३ करोड रुपैयाँ कर्जा परिचालन गरेको छ। गत वर्ष यही अवधिमा संस्थाले ३ अर्ब ९८ करोड रुपैयाँ सापटी लिई ४ अर्ब ९८ करोड रुपैयाँ कर्जा परिचालन गरेको थियो।

समीक्षा अवधिमा संस्थाले रिजर्भको आकार २४३.५२ प्रतिशतले बढाएर ३७ करोड १३ लाख रुपैयाँको उचाइमा पुर्याएको छ। गत वर्ष रिजर्भमा १० करोड ८० लाख रुपैयाँमात्रै थियो।

संस्थाको वार्षिकीकृत प्रतिसेयर आम्दानी (ईपीएस) २३.०४ रुपैयाँ, पीई रेसियो ६६.३५ गुणा र प्रतिसेयर नेटवर्थ १९४.४४ रुपैयाँ रहेको छ।