किसान लघुवित्तको नाफामा पहिरो, अन्य सूचकमा पनि खराब प्रदर्शन

काठमाण्डौ । किसान लघुवित्त वित्तीय संस्था लिमिटेडले चालु आर्थिक वर्षको दोस्रो त्रैमासको अपरिष्कृत वित्तीय विवरण सार्वजनिक गरेको छ।

वित्तीय विवरणअनुसार समीक्षा अवधिमा संस्थाले १५ लाख ८२ हजार रुपैयाँ खुद नाफा आर्जन गरेको छ। जुन गत वर्षको यही अवधिको तुलनामा ९६.५० प्रतिशतले कम हो। गत वर्ष यही अवधिमा संस्थाले ४ करोड ५२ लाख रुपैयाँ नाफा आर्जन गरेको थियो।

यो अवधिमा संस्थालाई ४ करोड १९ लाख रुपैयाँ सञ्चालन घाटा भएको छ। गत वर्ष यही अवधिमा संस्थाले ६ करोड ५४ लाख रुपैयाँ सञ्चालन मुनाफा गरेको थियो। 

समीक्षा अवधिसम्म संस्थाको खुद ब्याज आम्दानी ३३.९८ प्रतिशतले घटेर ११ करोड ५६ लाख रुपैयाँ भएको छ। गत वर्ष यही अवधिमा यस्तो आम्दानी १७ करोड ५१ लाख रुपैयाँ थियो।

चालु आर्थिक वर्षको ६ महिनामा संस्थाले ४ अर्ब ७४ करोड सापटी लिई ६ अर्ब ७४ करोड रुपैयाँ कर्जा परिचालन गरेको छ। गत वर्ष यही अवधिमा संस्थाले ५ अर्ब ११ करोड रुपैयाँ सापटी लिई ६ अर्ब ७३ करोड रुपैयाँ कर्जा परिचालन गरेको थियो।

चुक्तापुँजी ४७ करोड १३ लाख रुपैयाँ रहेको संस्थाको रिजर्भको आकार ५.१४ प्रतिशतले घटेर ३५ करोड २२ लाख रुपैयाँमा खुम्चिएको छ। गत वर्ष रिजर्भमा ३७ करोड १३ लाख रुपैयाँ रहेको थियो।

समीक्षा अवधिमा संस्थाको खराब कर्जा (एनपीएल) बढेर ४.९८ प्रतिशत पुगेको छ। गत वर्ष एनपीएल ४.७३ प्रतिशत थियो।

संस्थाको वार्षिकीकृत प्रतिसेयर आम्दानी (ईपीएस) ०.६७ रुपैयाँ र प्रतिसेयर नेटवर्थ १७४.७२ रुपैयाँ रहेको छ।