काठमाण्डौ । छिमेक लघुवित्त वित्तीय संस्थाको आर्थिक वर्ष २०७९–८०को चौथो त्रैमासको वित्तीय विवरण सार्वजनिक भएका छ। 

समीक्षा अवधिसम्म संस्थाको खुद नाफा १२.११ प्रतिशतले बढेर १ अर्ब ६ करोड रुपैयाँ भएको छ। अघिल्लो वर्ष संस्थाले ९४ करोड ७२ लाख रुपैयाँ खुद नाफा आर्जन गरेको थियो। 

समीक्षा अवधिसम्म संस्थाले १ अर्ब ५४ करोड रुपैयाँ सञ्चालन मुनाफा गरेको छ। अघिल्लो वर्ष यस्तो मुनाफा १ अर्ब ४५ करोड रुपैयाँ रहेको थियो। यो हिसाबले संस्थाको सञ्चालन मुनाफा पनि ५.७१ प्रतिशतले बढेको छ। 

चौथो त्रैमासम्म संस्थाको खुद ब्याज आम्दानी पनि १४.३२ प्रतिशतले बढेर २ अर्ब ८५ करोड रुपैयाँ भएको छ। अघिल्लो वर्ष खुद ब्याज आम्दानी २ अर्ब ४९ करोड रुपैयाँमा सीमित थियो। 

संस्थाको खराब कर्जा अनुपात (एनपीएल) बढेर १.७२ प्रतिशत पुगेको छ। अघिल्लो वर्ष यही अवधिसम्म एनपीएल ०.८३ प्रतिशत थियो। 

एनपीएल बढ्दा संस्थाको इम्पेयरमेन्ट चार्ज पनि बढेर ३४ करोड रुपैयाँ पुगेको छ। अघिल्लो वर्ष यस्तो चार्ज २१ करोड ६८ लाख रुपैयाँ थियो। 

चुक्तापुँजी २ अर्ब ८३ करोड रुपैयाँ रहेको संस्थाको सेयर प्रिमियममा ४ करोड ९ लाख रुपैयाँ रहेको छ भने वितरणयोग्य मुनाफा १ अर्ब ४५ करोड रुपैयाँ रहेको छ। यो हिसाबले संस्थाको लाभांश क्षमता ५२ प्रतिशत बढी देखिन्छ।

संस्थाको रिजर्भको आकार भने ८.३५ प्रतिशतले बढेर २ अर्ब ४२ करोड रुपैयाँको उचाइमा पुगेको छ। अघिल्लो वर्ष रिजर्भमा २ अर्ब २४ करोड रुपैयाँ थियो। 

चौथो त्रैमाससम्म संस्थाले ३० अर्ब ७१ करोड रुपैयाँ निक्षेप संकलन गरी ३२ अर्ब रुपैयाँ कर्जा लगानी गरेको छ। अघिल्लो वर्ष यही अवधिसम्म संस्थाले २७ अर्ब १ करोड रुपैयाँ निक्षेप संकलन गरी ३३ अर्ब ७ करोड रुपैयाँ कर्जा लगानी गरेको थियो। 

संस्थाको प्रतिसेयर आम्दानी (ईपीएस) घटेर ३७.४५ रुपैयाँ कायम भएको छ। अघिल्लो वर्ष ईपीएस ४०.७६ रुपैयाँ थियो। संस्थाको मूल्य आम्दानी अनुपात (पीई रेसियो) २२ गुणा र प्रतिसेयर नेटवर्थ २३८.२७ रुपैयाँ रहेको छ।