काठमाण्डौ । जनता बैंक नेपाललाई गाभेपछि देशकै ठूलो वाणिज्य बैंक बन्न सफल ग्लोबल आइएमई बैंक लिमिटेडले आकर्षक चालु आर्थिक वर्षको दोस्रो त्रैमास वित्तीय सार्वजनिक गरेको छ। 

दोस्रो त्रैमास वित्तीय विवरणअनुसार बैंकले १ अर्ब ६८ करोड रुपैयाँ खुद नाफा आर्जन गर्न सफल भएको छ। यो नाफा गत वर्षको यही अवधिको तुलनामा ३७.१३ प्रतिशतले बढी हो। गत वर्ष यही अवधिसम्म बैंकले १ अर्ब २२ करोड खुद नाफा आर्जन गरेको थियो। 

समीक्षा अवधिसम्म बैंकले १ अर्ब २० करोड रुपैयाँ वितरणयोग्य मुनाफा आर्जन गरेको छ। 

दोस्रो त्रैमाससम्म बैंकले २ अर्ब ३६ करोड रुपैयाँ सञ्चालन मुनाफा गरेको छ। गत वर्ष यही अवधिसम्म सञ्चालन मुनाफा १ अर्ब ७४ करोड रुपैयाँ रहेको थियो। 

त्यस्तै समीक्षा अवधिसम्म बैंकको खुद ब्याज आम्दानी ३ अर्ब ५४ करोड रुपैयाँ रहेको छ। गत वर्ष यही अवधिसम्म बैंकले २ अर्ब ३८ लाख रुपैयाँ खुद ब्याज आम्दानी गरेको थियो। 

बैंकले १ खर्ब ९७ अर्ब रुपैयाँ निक्षेप संकलन गरी १ खर्ब ९० अर्ब रुपैयाँ कर्जा प्रवाह गरेको छ। गत वर्ष यही अवधिसम्म बैंकले १ खर्ब २० अर्ब रुपैयाँ निक्षेप संकलन गरी १ खर्ब ८ अर्ब रुपैयाँ कर्जा प्रवाह गरेको थियो। 

बैंकले रिजर्भको आकार १२२.८७ प्रतिशतले बढाएको छ। गत वर्ष ३ अर्ब ३५ करोड रुपैयाँ रहेको बैंकको रिजर्भमा बढेर ७ अर्ब ४८ करोड रुपैयाँको उचाइमा पुगेको छ। 

ग्लोबल आइएमई बैंकको दोस्रो त्रैमासिक तथा साविकको जनता बैंक नेपालको मर्जरको मितिसम्मको मुनाफासमेत गरी प्रतिसेयर आम्दानी (ईपीएस) २२.५३ रुपैयाँ र गत असार १९ गतेको बजारमूल्यका आधारमा मूल्य आम्दानी अनुपात (पीई रेसियो) भने १३.१० गुणा रहेको छ।