पूँजी र मुद्राबजार केन्द्रीत बैठक धमाधम, सुधारका निर्देशन आउने

काठमाण्डौ । उच्चस्तरीय अध्ययन कार्यदलले बुझाएको प्रतिवेदनलाई कार्यान्वयनमा ल्याउन अर्थमन्त्रीले निर्देशन दिएसँगै मातहतका निकायहरु सक्रिय भएका छन् । 

अर्थमन्त्रीले डेपुटी गभर्नर शिवराज श्रेष्ठको संयोजकत्वमा उच्चस्तरीय अध्ययन कार्यदल बनाएका थिए । सो कार्यदलले बुधबार आफ्नो ५८ पृष्ठ लामो प्रतिवेदन अर्थमन्त्रीलाई बुझाएको थियो । 

कार्यदलबाट बुझेको प्रतिवेदन कार्यान्वयन गर्न भन्दै अर्थमन्त्रीले दिएको निर्देशनका आधारमा अर्थ मन्त्रालयले साँझ विज्ञप्ति जारी गरेको थियो । 

सो निर्देशनपछि बैंकहरुको ब्याजदर नियन्त्रणका लागि कार्यदलले सुझाएका उपायहरुको अवलम्बन गर्न नेपाल राष्ट्रबैंकले सक्रियता देखाएको छ भने पूँजीबजारको नियामक धितोपत्र बोर्ड समेत अर्थमन्त्रालयबाट पत्र आएलगत्तै आवश्यक सुधारका लागि सक्रिय हुने तयारीमा छ । 

नेपाल राष्ट्रबैंकको दवाब नेपाल बैंकर्स संघले अहिले बालुवाटारमा वाणिज्य बैंकका सीइओ तथा सीइओका प्रतिनिधिसँग छलफल गरिरहेको छ । नेपाल राष्ट्रबैंकका अधिकारी समेत सहभागी सो छलफलले पुनः ब्याजदरमा भद्र सहमति कायम गर्नसक्ने संभावना व्यक्त गरिएको छ । यहीकारण यो छलफलप्रति सबैको ध्यान मोडिएको छ । सेयर बजारका लगानीकर्ता र सरोकारवाला समेत बैंक ब्याजदरको बिषयमा कस्तो खालको सहमति आउँछ भनेर व्यग्रताका साथ पर्खिरहेका छन् । 

नेपाल राष्ट्रबैंकले समेत आफूले जारी गर्ने निर्देशनहरुको ड्राफ्ट बनाउने र साबिकको व्यवस्थामा संसोधनका लागि आवश्यक तयारीमा जुटेको त्यहाँस्थित स्रोतले जनाएको छ । ‘आजभोलिसम्म केही न केही हुन्छ ।’ उच्च स्रोतले भन्यो–‘र, प्रतिवेदनले अल्पकालीन रुपमा गर्नुपर्ने काम भनी सुझाएका बुँदा अर्को साताभित्र स्पष्ट रुपमा कार्यान्वयनमा आउसक्छन् ।’