काठमाण्डौ । महालक्ष्मी विकास बैंकले जेठ २ गते बिहीबार काठमाण्डौको मैतीदेवी शाखा कार्यालयको औपचारिक उद्घाटन गरेको छ । 

एक समारोहका बीच काठमाण्डौ महानगरपालिका वडानम्बर २०, मैतीदेवीमा स्थापित सो शाखा कार्यालयको नेपाल राष्ट्रबैंकको डेपुटी गभर्नर चिन्तामणि शिवाकोटीले उद्घाटन गरे । 

सो कार्यक्रममा सभापतिको आसन बैंकका सञ्चालक समितिका अध्यक्ष राजेश उपाध्यायले ग्रहण गरेका थिए भने विशेष अतिथिको रुपमा मैतीदेवीका वडाध्यक्ष दलबहादुर कार्की तथा बैंकका सञ्चालक समितिका सदस्य रुपेन्द्र पौडेल रहेका थिए ।

बैंकका प्रमुख कार्यकारी अधिकृत कृष्णराज लामिछानेले सो समारोहमा उपस्थित अतिथि, विभिन्न कार्यालयका प्रमुखहरु, व्यवसायी तथा स्थानीय सर्वसाधारणको उपस्थितिप्रति कृतज्ञता ज्ञापन गरेका थिए । उनले कार्यक्रममा बैंकले आफ्ना गहको आवश्यकतालाई सम्बोधन गर्दै आएको र आगामी दिनमा समेत उत्कृष्ट सेवा दिंदै जाने प्रतिबद्धता जनाएका थिए । 

देशका शहरी तथा ग्रामीण क्षेत्रका विभिन्न स्थानहरुमा ९३ वटा शाखा तथा ३५ वटा एटिएमहरुमार्फत सेवा प्रदान गरिरहेको महालक्ष्मी विकास बैंकको ग्राहक संख्या ४ लाख ५० हजार भन्दा बढी रहेको छ ।