काठमाण्डौ । जनता बैंक नेपाल लिमीटेडको आयोजनामा रसुवाको दुई स्थानमा ३ दिने बृहत निःशुल्क स्वास्थ्य शिविर तथा आँखा शिविर सम्पन्न भएको छ । 

संस्थागत सामाजिक उत्तरदायित्वमा ग्रामीण स्वास्थ्यलाई प्राथमिकतामा राखी देशको विभिन्न क्षेत्रमा विशेष गरी स्त्री तथा प्रसूति रोग सम्बन्धी र आँखा उपचारका लागि  निःशुल्क स्वास्थ्य शिविरहरु संचालन गर्ने क्रममा रसुवा जिल्लाको नौकुण्ड गाउँपालिकामा मंसिर २५ गते स्त्री तथा प्रसूति रोग, छाला सम्बन्धी रोग र सामान्य स्वास्थ्य परीक्षण गरिएको थियो भने मंसिर २५, २६ र २७ गते आँखा परीक्षण तथा मोतिबिन्दुको शल्यक्रिया गरिएको थियो । 

त्यस्तै, रसुवा जिल्लाकै कालिका गाँउपालिकामा मंसिर २६ गते स्त्री तथा प्रसूति रोग, छाला सम्बन्धी रोग र सामान्य स्वास्थ्य परीक्षण गरिएको थियो । 

सो क्षेत्रका विपन्न जनताहरुको स्वास्थ्य अवस्थालाई मध्यनजर गरी स्वास्थ्य शिविर संचालन गरिएको हो । नेपाल नेत्र ज्योति संघ अन्तर्गत भरतपुर आँखा अस्पताल र अल्का अस्पताल जावलाखेलको प्राविधिक सहयोगमा उक्त स्वास्थ्य शिविर सम्पन्न गरिएको हो । 

नौकुण्ड स्वास्थ्य शिविरको उद्घाटन रसुवा जिल्लाबाट प्रतिनिधित्व गर्ने प्रदेश नं. ३ कासांसदहरु प्रभात लामा र प्रेम लामाले संयुक्त रुपमा गरेका थिए ।  
शिविरमा कुल ८४६ जनाको बृहत स्वास्थ्य परीक्षण गरिएको थियो जसमध्ये ५४ जनाको शिविर स्थलमै मोतिबिन्दुको शल्यक्रिया गरिएको थियो । 

बिरामीहरुलाई आबश्यक औषधी र चश्मा निःशुल्क वितरण गरिएको थियो । स्त्री रोग सम्बन्धी उपचारका लागि लक्षित गरिएको शिविरमा पाठेघरको अपरेशन गर्नुपर्ने गरी पहिचान भएका बिरामीहरुलाई अपरेशनका लागि अस्पतालमा रिफर गरिएको छ । बैंकबाट उक्त रिफर भएका महिलाहरुको निःशुल्क अपरेशन गर्ने व्यवस्था मिलाइएको छ ।