"संस्थापनका नेताले झूठको खेती गरे"
व्यक्तिले उत्कृष्ट अर्थमन्त्रीको पदक पाउँदा जनताले के पाए ?

प्रश्न १ : तपाइँको उम्मेद्वारी केमा र किन ?

सुशील कोइरालाको शासनकालमा उहाँले आँगालेको कार्यशैली र पार्टीमा हाबी सिण्डीकेटीय प्रथाविरूद्ध मैले पहिलेदेखि नै असन्तुष्टि जनाउँदै आएको थिएँ । सधैँभरि पार्टीमा देखिने ६० र ४० को भागबण्डा र नेतामुखी, नातामुखी र दातामुखी शैलीले गर्दा पार्टीको आगामी बाटो नै घातक रहेको जनाउ दिएर मैले संस्थागत सुदृढीकरण तथा पार्टीको दीर्घकालीन हितका लागि मैत्रीपूर्ण प्रतिस्पर्धा मार्फत् नै पार्टीको नेतृत्व आवश्यक रहेको धारणासहित महामन्त्री पदमा उम्मेद्वारी दिन लागेको हुँ । 

प्रश्न २ : तपाईले किन संस्थापन पक्षलाई छाडेर देउवा पक्षलाई साथ दिने निर्णय गर्नुभयो ?
संस्थापन पक्षका नेताहरूको कार्यशैली र उनीहरूले गरेको झुटको खेतीका कारण नै मैले संस्थापन पक्षलाई साथ दिन नसकेको हँु । पहिले नेता शेखर कोइराला र सशांक कोइरालाले ‘अबको महामन्त्री हुने पालो तपाईको हो’ भनेर भनेकै हुन् । तर उनीहरूले आफैंले पहिले गरेको प्रतिबद्धता पूरा नगरेपछि हामीले सधैंभरि साथ दिन सकिन्छ नै भन्ने पनि त रहेन नि । म पार्टीमा धेरैले रुचाइएको नेता हुँ भन्ने कुरा महाधिवेशनमा यसअघि मेरो पोजिसनहरूले पनि देखाइसकेको छ । १० औं महाधिवेशनमा मेरो १० औं पोजिसन थियो भने ११ औं महाधिवेशनमा आइपुग्दा यो पोजिसन पाँचौंमा आइपुगेको थियो । अघिल्लो महाधिवेशनमा दोस्रो पोजिसनमा मैले चुनाव जितेकै हो । जुनसुकै पक्ष र खेमा भनेर छुट्टाए पनि हामी अन्तिममा काँग्रेस नै हौं । त्यसैले मलाई विश्वास छ, मतदाताले यो पटक पनि पहिलो पोजिशनमा आउने गरी महामन्त्रीमा निर्वाचित गराउनुहुनेछ । यो कुरा सबैले बुझ्नु प¥यो कि राजनीतिमा पद मागेर पाईँदैन । राजनीतिमा यो यसको छोरा, मैले यसको कोखबाट जन्म लिएको भनेर केही हुनेवाला छैन । तपाई पत्रकारहरूले पनि बिरासतको राजनीतिको पछि लाग्ने होईन कि वीरताको राजनीतिको पछि लाग्नु पर्यो ।

प्रश्न ३ : तपाईका आर्थिक एजेण्डा के छन् ?
राष्ट्रियता, सममाजवाद र लोकतन्त्र नेपाली काँग्रेसको मूलआधार हो र त्यसलाई हामीले कहिल्यै भूल्न हुन्न । हाम्रा आर्थिक सोंचहरू एडीबी, आईएमएफ र विश्व बैंकको प्रेसक्रिप्सनबाट प्रभावित छन् । यसले धेरै ठाउँमा हामीलाई चिप्लाइदिएको छ । तर सामाजिक न्याय तथा समाजवादी धारणाका लागि भने नयाँ ढंगले अगाडि बढ््नुपर्ने देखिन्छ । वीपीको समाजवादी चिन्तनलाई प्रभावकारी रूपमा लैजान पार्टी गम्भीर हुनुपर्ने बेला आएको छ । समाजवादी न्याय तथा सामाजिक सुरक्षा, समावेशीता र समतामूलक समाज निर्माणका लागि मैले नयाँ ढङ्गले अघि बढ्नलाई पनि महामन्त्री पदमा उम्मेद्वारी दिएको हुँ । 

प्रश्न ४ : बहुदल आएपछि संख्यात्मक हिसाबले पनि कांग्रेसले धेरैपटक अर्थ मन्त्रालयको जिम्मेवारी लियो । तर सो समयमा नेपाली काँग्रेसले उत्पादनमूलक क्षेत्रलाई प्राथमिकता नदिएको देखिन्छ, यसमा पनि अब समीक्षा आवश्यक छ ?
हो यसलाई पुनरावलोकन गर्नुपर्ने देखिन्छ । हुनतः म साथीहरूको धेरै आलोचना गर्न चाहन्न, तर पनि कुनै व्यक्तिले ‘विश्वकै उत्कृष्ट अर्थमन्त्री’को पदक पाइरहँदा जनताले के पाएका छन् भन्ने कुराले त सबै कुरा स्पष्टै छ नि । हामीले सधैभर केही मुठ्ठी भरका नेताहरूलाई मात्रै अर्थतन्त्रको ज्ञाता सम्झियौं दुर्भाग्य धेरै प्रतिभावान् खेलाडीलाई चाहि बिर्सियौं । अबको अर्थनीति कस्तो बनाउने भन्ने बिषयमा पनि हामी गम्भीर हुन आवश्यक छ ।