काठमाण्डौ । एनसीसी र कुमारी बैंकलाई सफल मर्जर गराएका रमेशकुमार अर्यालले कुमारी बैंकको  प्रमुख कार्यकारी अधिकृतबाट राजीनामा दिएका छन् । 

सीइओ अर्यालले तिहार विदाको अघिल्लो दिन दिएको राजीनामा आज बसेको बैंक सञ्चालक समितिको बैठकले स्वीकृत गरेको छ । 

सञ्चालक समितिको बैठकले बैंकका वरिष्ठ डेपुटी सीइओ रामचन्द्र खनाललाई सीइओमा नियुक्त गर्ने निर्णय समेत गरेको छ । 

यसअघि कुमारी बैंकका तत्कालीन सीइओ अनुजमणि तिम्सिनाले राजीनामा दिंदा समेत खनालले सीइओको जिम्मेवारी पाएका थिए । उनले सो बेला छोटो समयमै तत्कालीन कुमारी बैंकमा राम्रो सुधार गरेका थिए । 

तर, त्यही बीचमा एनसीसी बैंकसँग मर्जरको कुरा मिलेपछि सहमतिका आधारमा उनी ’ठूलो साइजको कुमारी बैंक’ वरिष्ठ डेपुटी सीइओमा बस्न तयार भएका थिए । 

कुमारी बैंकले मर्जरपछिको बैंकमा सञ्चालक समितिको अध्यक्ष पाएपछि सीइओ एनसीसी बैंकका तत्कालीन सीइओ समेत रहेका अर्याललाई दिइएको थियो । 

सीइओमा नियुक्त खनाल नेपालका वाणिज्य बैंकहरुमा करिअरको छोटो अवधिमा उपल्लो स्तरमा पुग्ने सीमित बैंकरमध्ये गनिन्छन् । उनी यसअघि पहिलो पटक कुमारी बैंकको सीइओ हुँदा बैंकिङ करिअर सुरु गरेको १२ वर्ष मात्र भएको थियो । 

खनाल पहिलोपटक कुमारी बैंकको सीइओ हुँदा बैंकिङ तरलताको समस्या थियो भने अहिले खराब कर्जाको । तरलता अभावको समयमा समेत निकै राम्रो परफरमेन्स गरेका खनालका लागि बैंकको बढ्दो खराब कर्जा टाउको दुखाईको विषय बन्नसक्छ । 

चार्टर्ड अकाउण्टेन्ट समेत रहेका खनालले १४ वर्षअघि सानिमा बैंकबाट सिनियर अफिसरबाट करिअर सुरु गरेका थिए । 

पुनः सीइओमा नियुक्त भएपछि बिजशालासँग प्रतिक्रिया दिंदै खनालले भने –‘मेरो लक्ष्य भनेको अबको एक वर्षभित्र कुमारी बैंकलाई नयाँ उचाईमा पुर्याउनु हो ।’