अमेरिकी राष्ट्रपति ट्रम्पले स्टील तथा एल्युमिनियमको आयातमा करहरु बढाइने घोषणा गरेका छन्।

ह्वाइट हाउसमा अमेरिकी धातु व्यवसायीहरुसंगको बैठक पछि बोल्दै राष्ट्रपति डोनल्ड ट्रम्पले चीनको नाम त लिएनन्, तर विदेशी आयातले अमेरिकी उद्योगहरुलाई नोक्सान पुगिरहेको बताए।

उनले, उनकै शब्दमा, दशकौंसम्म अरु मुलुकहरुको अनुचित व्यवहार भोगिरहेका अमेरिकी इस्पात तथा एल्युमिनियम उद्योगहरुलाई फेरि पुनर्स्थापित गरिने बताए।

उनले आउँदो साता इस्पातजन्य उत्पादनमा २५ प्रतिशत र एल्युमिनियममा १० प्रतिशत कर लगाउने आदेशमा आउँदो साता आफुले सही गर्ने अपेक्षा गरेको पनि जनाए।

विश्लेषकहरु भन्छन्, अमेरिकाले त्यस्तो निर्णय लिएमा चीनले पनि बदलामा अमेरिकी उत्पादनहरुमाथि कर बढाउने घोषणा गर्नसक्छ।

त्यस्तै सो घोषणाले क्यानडाजस्ता अमेरिकाका निकट सहयोगीहरुसंगको संबन्ध पनि बिग्रन सक्छ।

गत महिना वाणिज्य मन्त्री रसले बुझाएको एक प्रतिवेदनमा इस्पातको आयातका कारण अमेरिकाको राष्ट्रिय सुरक्षामाथि खतरा उत्पन्न भएको जनाएको थियो

अमेरिकाले सबैभन्दा बढी इस्पात क्यानडाबाट किन्दछ। त्यस्तै ब्रजील, दक्षिण कोरिया, मेक्सिको र रुसले पनि अमेरिकालाई इस्पात बिक्री गर्दछन्।

अमेरिकाले जति इस्पात निर्यात गर्दछ, त्यो भन्दा चार गुनाबढी आयात गर्दछ।

आफ्नो राष्ट्रपतीय चुनावी अभियानका क्रममा र चुनाव जितीसकेपछि पनि राष्ट्रपति ट्रम्पले सस्तो चिनियाँ आयातले अमेरिकी उद्योगहरुलाई नोक्सान पुगिरहेको बताउँदै आएका थिए।

गत वर्ष राष्ट्रपति ट्रम्पले इस्पातको आयातका कारण अमेरिकाको राष्ट्रिय सुरक्षामाथि खतरा उत्पन्न भएको छ कि छैन भन्नेबारे अनुसन्धान गर्न वाणिज्य मन्त्री विल्बुर रसलाई आदेश दिएकाथिए।

गत महिना वाणिज्य मन्त्री रसले बुझाएको एक प्रतिवेदनमा इस्पातको आयातका कारण अमेरिकाको राष्ट्रिय सुरक्षामाथि खतरा उत्पन्न भएको जनाएको थियो।

प्रतिवेदनले इस्पातको आयातमाथि २४ प्रतिशत कर लगाउनु पर्ने लगायतका सुझावहरु पनि दिएको थियो।

बिहीबार बिहान एक ट्वीट गर्दै राष्ट्रपति ट्रम्पले अब हाम्रो मुलुक, कम्पनीहरु र कामदारहरुको अरुले लाभ उठाइरहने स्थिति बनीरहनदिनु हुँदैन भनेकाथिए।

बीबीसीकी ह्वाइट हाउस संवाददाता तारा म्याक्केल्भी भन्छिन्, राष्ट्रपति ट्रम्प र उनका अन्य वरिष्ठ अधिकारीहरु व्यापार र चीनका विषयमा कडा देखिन चाहन्छन्।

तर उनी भन्छिन्, ट्रम्प प्रशासनभित्रै पनि कट्टरपन्थीहरु र व्यापारको मामिलामा अरु बढी सावधानी अपनाउनु पर्छ भन्नेहरु बीच द्वन्द्व रहेको स्पष्ट देखिन्छ।

व्यापारिक साझेदारहरू क्रुद्ध
संयुक्त राज्य अमेरिकाका प्रमुख व्यापारिक साझेदारहरूले स्टील र एलुमिनियम धातुको आयतमा कर लगाउने राष्ट्रपति ट्रम्पको निर्णयप्रति क्रुद्ध प्रतिक्रिया दिएका छन्।

युरोपेली संघ(इयु) र क्यानडाले आफूहरूले पनि जवाफी कदमहरू चाल्ने बताएका छन्।

राष्ट्रपति ट्रम्पको घोषणा पछि अमेरिकाको डाउ जोन्स परिसूचक डेढ प्रतिशत भन्दा बढीले घटेर बन्द भएको थियो।

त्यसअघि ट्रम्पले आगामी साता आफूले स्टिलका उत्पादनहरूमा २५ प्रतिशत र एलुमिनियमका सामाग्रीहरू १० प्रतिशत कर लगाउने घोषणा गरेका थिए।

युरोपेली आयोगका अध्यक्ष जाँ कल्ड युंकरले अमेरिकी कदमले हजारौं युरोपेलीहरूको रोजगारीलाई जोखिममा पार्ने बताए।

उनले इयु त्यसै चुप लागेर नबस्ने पनि प्रतिक्रिया दिएका छन्।

मेक्सिको र चीनले पनि प्रत्युत्तरमा चाल्ने कदमबारे सोचिरहेको बताएका छन्।

आलोचकहरूले थप कर लगाउने निर्णयले अमेरिकी रोजगारीलाई संरक्षण गर्न नसक्ने र अन्तत: उपभोक्ताहरूले नै त्यसको मूल्य चुकाउनुपर्ने टिप्पणी गरेका छन्।

वरिष्ठ रिपब्लिकन संसद पल रायनका एक जना प्रवक्ताले उनले राष्ट्रपति ट्रम्पले आफ्नो निर्णयले निम्त्याउन सक्ने नसोचिएका प्रभावबारे विचार गर्ने अपेक्षा व्यक्त गरेका छन्।

राष्ट्रपति ट्रम्पले स्टील र एलुमिनियमको आयातमा करहरू लगाउने घोषणा गर्ने क्रममा अमेरिकी उद्योगहरू धराशायी भएको र त्यसका लागि अरू देशहरू र विगतका सरकारहरू जिम्मेवार रहेको टिप्पणी गरे।

उनले कर लगाइएपछि अमेरिकी स्टील र एलुमिनियम क्षेत्रमा धेरै सकारात्मक प्रभावहरू देखिने पनि दावी गरे।

यसअघि अमेरिकी वाणिज्य मन्त्रालयले उक्त कदम चाल्न सिफारिस गर्दै धातुहरूको आयात अमेरिकी राष्ट्रिय स्वार्थ विपरित भएको र त्यसले देशभित्र रहेका धातु उद्योगहरूको क्षमता कमजोर बनाइरहेको बताएको थियो।

-BBC