धेरै नाफा कमाउने विकास बैंक बन्यो मुक्तिनाथ: महालक्ष्मी र कैलाश पछ्याउँदै (टेबलसहित)

काठमाण्डौ । राष्ट्रिय स्तरका ११ वटै विकास बैंकले आर्थिक वर्ष २०७४/७५ को अपरिस्कृत वित्तीय विवरण प्रकाशित गरेका छन् । वित्तीय विवरण प्रकाशित गरेकामध्ये २ वटाको खूद नाफा घटेको छ भने बाँकीले नाफामा राम्रो प्रगति गरेका देखिएको छ ।

कम्पनीहरुले प्रकाशन गरेका वित्तीय विवरणको आधारमा हेर्दा आर्थिक वर्ष २०७४/७५ मा सबैभन्दा बढी नाफा मुक्तिनाथ विकास बैंकले गरेको छ । यो बैंकले ५७ करोड ५४ लाख बढी खूद नाफा आर्जन गरेको हो । 

मुक्तिनाथलाई पछ्याउँदै महालक्ष्मी विकास बैंकले खूद नाफातर्फ दोश्रो स्थान कब्जा गरेको छ । महालक्ष्मीको नाफा ५६ करोड ११ लाख रुपैयाँ रहेको छ । 

यस्तै, अन्य आर्थिक वर्षहरुमा सबैभन्दा बढी नाफा कमाउने विकास बैंक बन्ने सफलता पाइरहेको कैलाश विकास बैंक यो पटक भने तेश्रो स्थानमा धकेलिएको छ । यो बैंकको खूद नाफा ५५ करोड २५ लाख रुपैयाँ रहेको छ । 

नाफाको दृष्टिकोणले गण्डकी विकास बैंकले चौथो स्थान सुरक्षित गरेको छ । यो बैंकले ५० करोड १८ लाख खूद नाफा आर्जन गरेको छ । पाँचौ स्थानमा ४३ करोड ७८ लाख नाफा कमाउँदै गरिमा विकास बैंक समेटिएको छ । 

नाफा आर्जनमा सांग्रीला डेभलपमेन्ट बैंक र देवः विकास बैंक भने कमजोर देखिएका छन् । सांग्रीलाको नाफा ३४ करोड ७७ लाखबाट घटेर ३२ करोड ७६ लाखमा सीमित बन्न पुगेको छ भने देवः विकास बैंकको नाफा पनि २८ करोड ९४ लाखबाट खिइएर २७ करोड ५३ लाखमा सीमित भएको छ । 

नाफा आर्जनको हिसाबले कुन बैंक कुन स्थानमा परे ? यो टेबल हेर्नुहोस्:

कसको प्रगति कस्तो ?
हामीले ११ वटा विकास बैंकले नाफातर्फ गरेको प्रगतिको आधारमा समेत विश्लेषण गर्ने कोशिश गरेका छौ । जसअनुसार नाफातर्फ लुम्बिनी विकास बैंकले कमालको प्रगति गरेर देखाएको छ । यो बैंकले १२९.४९ प्रतिशतले नाफा बढाएको हो । 

कामना सेवा विकास बैंकले समेत नाफामा ९४.४५ प्रतिशतको फड्को मारेको देखिएको छ । नाफातर्फको प्रगतिको हिसाबले ३३.५८ प्रतिशतको बढोत्तरीसहित ज्योति विकास बैंक तेश्रो स्थानमा छ । २६.७८ प्रतिशतको प्रगतिसहित गरिमा चौथो र २६.३१ प्रतिशतको वृद्धिसहित महालक्ष्मी पाँचौ स्थानमा छन् । 

कुन बैंकको नाफातर्फको प्रगति कस्तो देखियो त ? हेरौं यो टेबल: