काठमाण्डौ । राष्ट्रिय बीमा कम्पनीको उच्च व्यवस्थापन टिम र कर्मचारी संघबीच १० बुँदे सहमति भएको छ। 

कम्पनी व्यवस्थापन र ट्रेड युनियनका प्रतिनिधिबीच साउन २६ गते सम्झौतापत्रमा हस्ताक्षर भएको हो। कर्मचारी विनियमावली, २०७४ पूर्ण लागू नगरेको भन्दै राष्ट्रिय बीमा कम्पनी कर्मचारी संघ गत साउन १ गतेदेखि आन्दोलनमा उत्रिएका थिए। साउन २६ गते दुवै पक्षबीच सहमति भएसँगै संघले सोही मितिदेखि आन्दोलनका कार्यक्रमहरु स्थगित गरेको छ।

सम्झौतापत्रमा कम्पनीको व्यवस्थापनतर्फबाट प्रमुख कार्यकारी अधिकृत (सीईओ) शेखर बराल, डीसीईओ सुवास कोइराला, मुख्य व्यवस्थापक रजनी पौडेल र कम्पनी सचिव सिर्जना पन्त र कर्मचारी ट्रेड युनियनका तर्फबाट अध्यक्ष डम्बरदेव अधिकारी, उपाध्यक्ष रवीन्द्र थापा र सचिव अर्जुन पौडेल र नेपाल वित्तीय संस्था कर्मचारी संघका तर्फबाट अध्यक्ष दीपकराज पाण्डे, वरिष्ठ अध्यक्ष सबिन पौडेल र महासचिव अभिमन्यु खनाललले संयुक्त रुपमा हस्ताक्षर गरेका छन्।   

यस्ता छन् व्यवस्थापन टिम र ट्रेड युुनियनका प्रतिनिधिबीच भएको १० बुँदे सहमति

  • कम्पनीका बाँकी रहेको लेखापरीक्षणलाई २०८१ साल चैत मसान्तसम्ममा अद्यावधिक गरिनेछ। सो कार्य सम्पन्न गर्न क्रियाशील ट्रेड युनियन एवं सम्पूर्ण कर्मचारीको पूर्ण सहयोग रहनेछ। 
  • कम्पनीको प्रधान कार्यालय रहेको जग्गा प्राप्तिलाई तीव्रता दिई भवन निर्माणको कार्यलाई तीव्रता दिइनेछ। 
  • कम्पनीका कर्मचारीको क्षमतावृद्धिका लागि तालिम कार्यविधिलाई व्यवस्थित गर्न २ महिनाभित्र तालिम तथा सेमिनार कार्यविधि तर्जुमा गरी सञ्चालक समितिको स्वीकृतिमा लागू गरिनेछ। 
  • कम्पनीको महत्वपूर्ण रणनीतिक तथा व्यवस्थापकीय निर्णय प्रक्रियामा कर्मचारी ट्रेड युनियनका प्रतिनिधिलाई आवश्यकताबमोजिम सहभागिता गराइनेछ। 
  • कम्पनीको संगठन तथा व्यवस्थापन सर्वेक्षण कार्यलाई यसै आर्थिक वर्षभित्र सम्पन्न गरिनेछ। 
  • कम्पनीको भौतिक संरचनामा आवश्यक सुधार गरी यथाशीघ्र उपयुक्त वातावरण सिर्जना गरिनेछ। 
  • कर्मचारी विनियमावलीमा उल्लेख भएका कार्यविधिहरुलाई आवश्यक प्रक्रिया पूरा गरी ३० दिनभित्र कार्यान्वयनमा ल्याइनेछ। 
  • कर्मचारी विनियमावलीमा उल्लेख भएका विनियमावलीलाई संचालक समितिसँग कार्यान्वयन गर्न टे«ड युनियनका प्रतिनिधिलाई समेत सहभागी गराइनेछ। 
  • कर्मचारीको मागका सम्बन्धमा सञ्चालक समितिबाट मिति २०७९ मंसिर १८ मा भएको निर्णयअनुसार गठित सञ्चालक समितिको संयोजकले दिएको प्रतिवेदनलाई यथाशीघ्र अगाडि बढाई २०८० साल चैत मसान्तभित्र कार्यान्वयनमा ल्याइनेछ। 
  • कर्मचारी ट्रेड युनियनका जारी सम्पूर्ण आन्दोलनका कार्यक्रम हाललाई स्थगित गरिएको छ।