काठमाण्डौ । साउदी अरबका ऊर्जामन्त्री राजकुमार अब्दुलअजिज बिन सलमानले रुसमाथि पश्चिमी देशहरुले लगाएको प्रतिबन्धका कारण भविष्यमा ऊर्जा संकट आउने चेतावनी दिएका छन्।

समाचार एजेन्सी रोयटर्सका अनुसार ऊर्जामन्त्री अब्दुलअजिजले राजधानी रियादमा आयोजित एक सम्मेलनमा यस्तो चेतावनी दिएका हुन्। एक प्रश्नको जबाफमा उनले भने, ‘प्रतिबन्ध र लगानीको अभावका कारण सबैभन्दा बढी आवश्यक परेको बेला सबै प्रकारका ऊर्जाको अभाव हुनेछ।’

अब्दुलअजीजले पनि आफ्नो देशले युक्रेनमा एलपीजी पठाउने तयारी गरिरहेको बताए। युक्रेनमा यो मुख्यतया घरहरु न्यानो राख्न प्रयोग गरिन्छ।

तेल बजारका लागि वर्ष २०२२ लाई पाठका रुपमा लिनुपर्ने उल्लेख गर्दै अब्दुलअजीजले विश्वका अन्य देशले ओपेक प्लसदेशहरुलाई विश्वास गर्नुपर्ने बताए।

युरोपेली संघले रुसमाथि धेरै किसिमका प्रतिबन्ध लगाएपछि रुसको आयात घटेको छ। यही बेला अन्य पश्चिमी देशहरुले पनि रुसको आर्थिक क्षमता सीमित गर्न थुप्रै प्रतिबन्ध लगाएका छन्। –एजेन्सी