स्पर्श लघुवित्तको एजीएमबाट २.६९ करोडको आइपीओ निश्कासनको प्रस्ताव पारित

काठमाण्डौ । पोखरा कास्कीको बिजयपुरमा केन्द्रीय कार्यालय रहेको स्पर्स लघुवित्त वित्तीय संस्थाले सर्वसाधारणका लागि २ करोड ६९ लाख ६३ हजार रुपैयाँ बराबरको आइपीओ निश्कासन गर्ने प्रस्ताव पारित गरेको छ । 

स्पर्श लघुवित्तको कात्तिक १८ गते सम्पन्न दोश्रो वार्षिक साधारणसभाले संस्थापक तथा सर्वसाधारणको सेयर स्वामित्वलाई मिलाउन सर्वसाधारणका लागि आइपीओ जारी गर्ने प्रस्ताव पारित गरेको हो । 

संस्थाका प्रमुख कार्यकारी अधिकृत सजल खड्काका अनुसार विशेष प्रस्ताव अन्तर्गत प्रबन्धपत्र तथा निमयावलीमा संसोधन, जारी पुजीलाई वृद्धि गर्दै संस्थापक तथा सर्वसाधारणको शेयर स्वामित्वलाई ७०ः३० को अनुपातबाट ६७.५०ः३२.५० हुने गरी संशोधन गर्ने तथा थप पाँच जिल्लामा कार्यक्रम विस्तार गर्ने प्रस्ताव पारित भएको छ ।सभाले प्रस्तावित जारी पुँजी रु.८ करोड २९ लाख ६३ हजारको ३२.५ प्रतिशतले हुन आउने रु.२,६९,६३,००० बरबरको २,६९,६३० कित्ता साधारण शेयर सर्वसधारणलाई जारी गर्न सर्वसम्मतिले पारित गरेको हो । 

जनता बैंक नेपाल लि, मेगा बैंक नेपाल लि. र ७५ जना व्यवसायिक तथा प्रतिष्ठित व्यक्तित्वहरुले प्रर्वद्धन गरेको यो वित्तीय संस्थाले हाल २० वटा शाखा मार्फत करिब १२,००० सदस्यहरुलाई ४६ करोड कर्जा लगानी गरेको छ । यो कम्पनीले करिब ९ करोड बचत संकलन गरेको खड्काले बताए । रु.१० करोड अधिकृत पुँजी रहेको वित्तीय संस्थाको हाल चुक्ता पुँजी रु.५ करोड ६० लाख रहेको छ भने सर्वसाधारणलाई शेयर जारी गरे पश्चात रु.८ करोड २९ लाख पुग्नेछ ।

दोश्रो वार्षिक साधारणसभाले अध्यक्षको वार्षिक प्रतिवेदन, आ.व.२०७५/०७६ को लागि लेखापरीक्षकको नियुक्ति, आ.व.२०७४/०७५ को वासलात, नाफा नोक्सान हिसाब, नगद प्रवाह विवरण र इक्विटीमा भएको परिवर्तन आदि सर्वसम्मतिबाट पारित गरेको हो ।